Táýelsizdigimizdiń 30 jyldyq merekesine orai Túrkistan qalasynda qazaqtyń birtýar qairatkeri, tarihi tulǵa – Qazybek bi Keldibekulynyń eskertkishi ornatyldy. Tas músin «Qaz daýysty Qazybek bi» qorynyń demeýshiligimen jáne Túrkistan qalasy ákimdiginiń qoldaýymen eńse tiktedi, dep habarlaidy QazAqparat.
Eńseli eskertkishtiń jalpy biiktigi – 8 metr, mystan quiylǵan. Avtory – tanymal músinshi, Eýraziialyq dizainerler odaǵynyń múshesi Bekseiit Kúzembekov.
Túrkistandaǵy Qazybek bi kóshesindegi «Qazybek bi» alleiasynan boi kótergen eskertkishtiń ashylý saltanatyna elimizdiń túkpir-túkpirinen ziialy qaýym ókilderi, tarihshylar jáne bidiń urpaqtary keldi. Saltanatty is-sharada Túrkistan oblysy ákiminiń orynbasary Sáken Qalqamanov Qazaq handyǵynyń nyǵaiýyna eleýli úles qosqan Qazybek bidiń tarihtaǵy orny erekshe ekenin atap ótti.
«Biz búgin qos birdei aitýly kúnniń qurmetine bas qosyp otyrmyz. Onyń alǵashqysy – Táýelsizdiktiń 30 jyldyq merekesi. Búgingidei keregemiz keń, bosaǵamyz bútin zamanda kún keshýimiz – Táýelsizdik syilaǵan tynyshtyq pen turaqtylyqtyń arqasy. Elbasy Nursultan Nazarbaevtyń óńirimizdi Túrkistan oblysy dep atap, onyń ortalyǵy retinde tarihi Túrkistandy belgileýi – Táýelsizdiktiń jarqyn jeńisi dep bilemin. Sonymen qatar rýhani shahar tórinde Qazybek bi babaamyzdyń eńseli eskertkishi boi kóterýde. Uly tulǵa beinesiniń Túrki jurtynyń mádeni-rýhani ortalyǵynda boi kóterýi – zańdylyq. Onyń alǵashqy sebebi – Qazybek bi Keldibekulynyń Qoja Ahmet Iasaýi kesenesinde jerlenýi. Qazaq rýhaniiatynyń jandanýyna ólsheýsiz úles qosqan Qazybek bi beinesi óskeleń urpaqty izgilikke baǵyttaityn baǵdary bolady dep senemin», – dedi Sáken Qalqamanov.
Saltanatty jiynda Qazaq eliniń tuńǵysh ǵaryshkeri, «Halyq qaharmany» Toqtar Áýbákirov, QR Ulttyq ǵylym akademiiasynyń akademigi Ǵalymqaiyr Mutanov jáne Túrkistan oblystyq Aqsaqaldar alqasynyń tóraǵasy Jarylqasyn Áziretbergen quttyqtaý sóz sóilep, qazaqtyń ardaqty bii týraly oi qozǵap, Túrkistan tórindegi igi isti joǵary baǵalady. Igi is-sharadan keiin dańqty baba rýhyna arnalyp as berildi.
Sonymen birge osy kúni Qoja Ahmet Iasaýi atyndaǵy HQTÝ-dyń májilis zalynda «Qaz daýysty Qazybek bi: tulǵa jáne tarih» atty ǵylymi konferentsiia uiymdastyryldy. Jiynda Túrkistan oblystyq qoǵamdyq damý basqarmasynyń basshysy Ańsar Óserbaev qatysýshylardy Táýelsizdiktiń 30 jyldyǵymen quttyqtap, oblys ákimi Ómirzaq Shókeevtiń quttyqtaý hatyn oqyp berdi. Eskertkishti salýǵa úles qosqan «Qaz daýysty Qazybek bi» qorynyń ókilderine estelik syilyq pen alǵys hattardy tapsyrdy. Sonymen birge konferentsiia barysynda elimizge tanymal professorlar men ǵalymdar Qazybek bi Keldibekulynyń tarihtaǵy orny, onyń memleketti qalyptastyrýdaǵy eńbegi, tulǵa men Túrkistan arasyndaǵy bailanys týraly qundy derekterdi qamtyp, baiandama jasady. «Qaz daýysty Qazybek bi» qoǵamdyq qorynyń tóraǵasy Pernebai Dosymbek Túrkistan tórindegi oń ózgeristerge, tulǵalardy qurmetteý baǵytyndaǵy bastamalarǵa rizashylyqtaryn bildirdi.
