Túrkistanda Sport kúni merekesi joǵary deńgeide atalyp ótti. «Túrkistan-Arena» stadionynda ótken is-sharada oblys sportshylarynyń jeńip alǵan júldeleriniń kórmesi jurtshylyq nazaryna usynyldy. Álemdik deńgeidegi kýboktar men medaldar kórsetildi. Jalpy biyl 7 ai kóleminde Túrkistan oblysynyń sportshylary jalpy sany 1000-ǵa jýyq medal oljalap, bul kórsetkish boiynsha respýblikada aldyńǵy qatarda kele jatyr.
Saltanatty jiynda biyl respýblikalyq jáne halyqaralyq dodalarda jeńiske jetken sportshylarǵa jáne bilikti bapkerlerge Túrkistan oblysynyń ákimi Ómirzaq Shókeevtiń Gramotasy men Alǵys hattary tapsyryldy. Sonymen birge «Oblysqa sińirgen eńbegi úshin» medaldary óz ielerin tapty.
«Amanat» partiiasy Túrkistan oblystyq filialynyń atqarýshy hatshysy Beisen Tájibaev sportshylardy kásibi merekemen quttyqtap, bir top sportshy men sala úzdikterine partiia filialy atynan Alǵys hattar tapsyrdy. Sondai-aq oblystyq máslihat pen máslihat hatshysynyń Alǵys hattary da sportshylardyń mereiin ústem etti.
Túrkistan oblystyq dene shynyqtyrý jáne sport basqarmasynyń basshysy Qanat Joldyqaraev sportshylar men bapkerlerdiń eńbegin joǵary baǵalap, óńirde sport salasy qarqyndy damyp jatqanyn atap ótti. Birqatar chempion men bapkerge, osy salada qyzmet etip júrgen azamattarǵa marapat tapsyryp, qurmet kórsetti.
Merekelik is-sharada jas sportshylar stadion tórinde óz sport túrleri boiynsha jattyǵýlardan úzindi kórsetse, bishiler toby da óz ónerlerin kórsetti. Ánshiler patriottyq ánderdi shyrqady.
Oblys ákimi Ómirzaq Shókeevtiń tapsyrmasymen óńirde sport nysandary kóbeiip keledi. Biýdjet esebinen de, jeke kásipkerler qoldaýy arqyly da sport keshenderiniń sany kóbeiip jatyr. Túrkistan qalasynyń ózinde az ǵana ýaqytta «Túrkistan-arena» stadiony, olimpiadalyq rezervin daiarlaý ortalyǵy, «Olympic Center» kesheni, halyqaralyq tennis ortalyǵy ashyldy. Qazirgi tańda Bekzat Sattarhanov atyndaǵy sport kesheni, «Muz saraiynyń» qurylysy júrip jatyr. Eskek esý bazasy, atshabar da ashylatyn bolady.
Nómiri birinshi sport túri fýtbolǵa mán berilip, oblystyń eki komandasy premer-ligada oinap jatyr. «Turan» akademiiasynyń jastary Qazaqstan chempiony atanyp, chempiondar ligasyna joldama aldy. «Tomiris- Turan» komandasy da chempiondar ligasynda óner kórsetýde.
Osy jyldyń 7 aiynda oblys sportshylary sporttyn 59 túri boiynsha el chempionattary men birishilikterine qatysyp, 707 medalge kol jetkizdi. Onyń 290-y – altyn. Jyl basynan beri ótken Aziia chempionattary men kýboktarynda oblys sportshylary 168 (101 altyn, 40 kúmis jáne 27 qola) medalge qol jetkizse, álem chempionattary men kýboktarynda jalpy 53 (20 altyn, 22 kúmis jáne 11 qola) medalge ie bolǵan. Óńir sportshylary komandalyq dodalar men spartakiadalarda únemi úzdikter qatarynan tabylyp júr. Biyl jýrnalister spartakiadasy, byltyr «Aq bidai» aýyl oiyndarynda top jardy.
Jyl basynan beri Túrkistan óńiriniń 5 sportshysy halyqaralyq dárejedegi sport sheberi atansa, 87 sportshy QR sport sheberi normativin oryndaǵan. 214 saiypqyran sport sheberligine úmitker dárejesine jetip otyr.
Búginde oblysta dene shynyqtyrý jáne sporten shuǵyldanatyn turǵyndar sany 764 myń adamǵa jetti. Bul – oblystaǵy jalpy halyqtyń 36,7 paiyzy.
