Túrkistanda Halyqaralyq qarttar kúni merekesi atalyp ótti. Saltanatty is-sharaǵa Túrkistan oblysynyń ákimi Darhan Satybaldy qatysyp, óńir aqsaqaldary men ardaqty ájelerin quttyqtap, qurmet kórsetti, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
«Barshańyzdy 1 qazan – Halyqaralyq qarttar kúni merekesimen shyn júrekten quttyqtaimyn. Qazaq halqynda «Qarty bar el qazynaly el» degen naqyl sóz bar. Úlkendi syilaý, olarǵa qurmet kórsetý – ata-babadan kele jatqan saltymyz. El Prezidenti Qasym-Jomart Toqaev jýyrda Túrkistan turǵyndarymen kezdesýde shaharǵa qoldaý jalǵasatynyn aitty. Bul rette óńirdi damytýda sizderdiń de eńbekterińiz mol. Oblysta 179 myńnan astam ardagerimizdiń áleýmettik jaǵdaiyn jaqsartý maqsatynda ár túrli baǵytta jumystar atqarylyp, mádeni-rýhani ómirge belsene aralasýlaryńyzǵa qolaily jaǵdai jasalýda. Mereili merekede barshańyzǵa zor densaýlyq, uzaq ómir, otbasylaryńyzǵa – amandyq, urpaqtaryńyzǵa baq-bereke tileimin», – dedi D.Satybaldy.
Merekelik is-sharaǵa aýdan, qalalardan oblysqa eńbegi sińgen eńbek ardagerleri men ziialy qaýym ókilderi shaqyrylyp, qurmetke bólendi. Olardyń birqataryna alǵys hattar tapsyryldy. Óńir basshysy aǵa býynmen pikirlesip, usynystary men oilaryn tyńdady.
Oblystyq ardagerler keńesiniń tóraǵasy Jeńisbek Máýlenqulov pen «Amanat» partiiasynyń Túrkistan oblystyq filialynyń atqarýshy hatshysy Beisen Tájibaev ta ardagerlerdi quttyqtady.
Osy kúni Túrkistan qalasynda «Belsendi uzaq ómir súrý» ortalyǵy ashyldy. Ǵimarattyń jalpy alańy – 728 sharshy metr. 2022 jylǵa Túrkistan qalasynyń biýdjetinen ortalyqty ustaý jáne qyzmetterdi kórsetýge tiisti qarjy bólinip, 19 shtattyq birlik quryldy. Ortalyqta kúndelikti 70 zeinetkerge tiisti qyzmet kórsetiledi. Bir jylda 2500 ardager tynyǵady. Jalpy oblysta «Belsendi uzaq ómir súrý» ortalyqtarynyń sany 10-ǵa jetip otyr.
Túrkistan oblysynda 2022 jylǵy 1 qazandaǵy jaǵdaimen 179 633 myń zeinet jasyndaǵy qarttar men ardagerler turady. Onyń 20-y Uly Otan soǵysynyń ardagerleri bolsa, 4,8 myńnan astamy – tyl eńbekkerleri. Búgingi tańda memleketpen kepildendirilgen tólemder kólemi jyl saiyn kóterilýde, oblystyq jáne jergilikti biýdjetter qarjysy esebinen de túrli áleýmettik qoldaýlar uiymdastyrylyp keledi. Jalpy óńir ardagerlerine ai saiyn 15,8 mlrd. teńge kóleminde zeinetaqy tólemi júrgiziledi. Egde jastaǵylardy saýyqtyrý maqsatynda jyl saiyn oblystyq biýdjet esebinen «Ardagerler úii» men «Meiir» ardagerler úilerinde jyl saiyn 8 myńǵa jýyq qariia densaýlyǵyn túzep keledi.
