Foto: Túrkistan oblysy ákimdigi
Túrkistan oblysynyń jumyspen qamtýdy úilestirý jáne áleýmettik baǵdarlamalar basqarmasynyń jańadan ashylatyn «Camǵaý» ońaltý ortalyǵy 150-den astam bos jumys ornyn usyndy. Búgin oblystyq «eńbek mobildiligi ortalyǵynyń» uiymdastyrýymen saýran aýdany, oranǵai eldi mekeninde bos jumys oryndary jármeńkesi ótti.
Jármeńkege oblystyq jumyspen qamtýdy úilestirý jáne áleýmettik baǵdarlamalar basqarmasy basshysynyń orynbasary Nurjan Nurashov, Saýran aýdany ákiminiń orynbasary Baqytjan Býkebaev qatysyp, jumyssyz júrgen azamattarǵa turaqty jumysqa ornalasýlaryna sáttilik tiledi.
Ortalyqtyń ashylýyna bailanysty meditsinalyq, arnaýly áleýmettik-pedagogikalyq, psihologiialyq, eńbek, mádeni, áleýmettik-turmystyq, sharýashylyq qyzmet kórsetý personaldary jumysqa qabyldanady. 200 oryndyq nysan 18 jastan asqan múgedektigi bar adamdarǵa jartylai statsionarlyq jaǵdaida arnaýly áleýmettik qyzmet kórsetýge arnalǵan. Basqarma basshysynyń orynbasary Nurjan Nurashovtyń aitýynsha qyzmetkerler quramy iriktelip, resmi ashylýy qazan aiyna josparlanýda.
Arnaiy mamandar bos jumys oryndary jármeńkesine Saýran aýdany, Kentaý jáne Túrkistan qalalarynan kelgen turǵyndardy qabyldap, keńes berdi. Oblystyq «Eńbek mobildiligi ortalyǵy» KMM direktory Abzal Kazankapov jármeńkege 250-den astam adam qatysqanyn jetkizdi.
Búginde, Túrkistan oblysynda 99 myńnan astam múgedektigi bar adam esepte tur. Onyń ishinde 84 myńnan astamy - eresekter bolsa, 15 myńy - balalar. Arnaýly áleýmettik qyzmet alýshy sanatyndaǵylar sany - 34 370 adam. Oblystyq basqarmaǵa qarasty statsionarlyq jaǵdaidaǵy, jartylai statsionarlyq jaǵdaidaǵy, sondai-aq beiimdeý jáne saýyqtyrý, jumyspen qamtý baǵytynda jalpy 14 mekeme jumys isteidi. Qazirgi tańda Saýran aýdanynyń Oranǵai aýylynda 50 oryndyq psihonevrologiialyq aýytqýy bar múgedek balalarǵa arnaýly áleýmettik qyzmetter kórsetý ortalyǵynyń qurylysy júrgizilýde. Ǵimaratty 2025 jyldyń I toqsanynda paidalanýǵa tapsyrý kózdelgen.
Aita keteiik, budan buryn Túrkistan oblysynda ońaltý ortalyqtary salynyp jatqanyn jazǵan bolatynbyz.
