Túrkistan oblysynda toihanalar jabylyp jatqan soń, turǵyndar otbasylyq sharalardy úilerinde jasaýǵa kóshken. Maqtaaral aýdanynda politseiler úiinde toi jasaǵan eki turǵyndy anyqtady, dep habarlaidy "Ult aqparat".
Oblystyq Politsiia departamenti baspasóz qyzmetiniń málimetinshe, Maqtaaral aýdanyna qarasty Gúlistan aýylyndaǵy turǵyn úilerdiń birinde toi ótip jatqany belgili bolǵan. Karantin talaptaryn óreskel buzǵan turǵyn 50-ge jýyq adamǵa «Qyz uzatý» toiyn jasap, qonaqtar jinap alǵan. Sonymen qatar politsiia qyzmetkerleri kelesi bir úide 50 adam jinalyp, «Betashar» toiyn ótkizip jatqanyn anyqtaǵan.
Ýchaskelik politsiia inspektorlary eki toidy da tarqatyp, jinalǵan qaýymǵa túsindirý jumystaryn júrgizgen. Karantin talabyn saqtamai, adamdardyń kóptep jinalýyna jol bergen toi ielerine qatysty QR ÁQBtK-niń 425-baby «Halyqtyń sanitariialyq epidemiologiialyq salamattylyǵy salasyndaǵy zańnama talaptaryn, sondai-aq gigenalyq normativterdi buzý» boiynsha ákimshilik hattamalar toltyrylǵan. Barlyq qujattar Maqtaaral aýdandyq sanitarlyq epidemiologiialyq baqylaý basqarmasyna joldanǵan.
