Túrkistan oblysynyń jańa «Turan» komandasy quryldy. Oblys əkimi Ómirzaq Shókeevtiń bastamasymen jasaqtalǵan bul komanda otandyq fýtboldyń damýyna úlesin qosatyn bolady, dep habarlandy óńir basshysynyń resmi saitynda.
Bul týraly oblys ákiminiń orynbasary Sáken Qalqamanov Óńirlik kommýnikatsiialar qyzmetinde ótken brifingte málimdedi.
«QR Fýtbol federatsiiasynyń Atqarýshy komiteti kezekti otyrysta Premer-Ligada oinaityn komandalar quramyn 14-ke deiin kóbeitý týraly sheshim shyǵardy. Qazaqstannyń 1-Ligasynda bizdiń oblystan úsh komanda qatysqan bolatyn. Olar - «Maqtaaral», «Arys», «Qyran» komandalary. Biz osy úzdik úsh komandadan irikteý júrgizip, oblystyń, eldiń namysyn qorǵaityn «Turan» fýtbol komandasyn jasaqtap jatyrmyz. Jańa fýtbol klýbyn qurý mártebesine orai, Túrkistan oblysynyń ákimdigi «Turan» fýtbol komandasynyń jańa logotipin qalyptastyrý úshin báige jariialap otyrmyz. Baiqaýǵa Qazaqstannyń barlyq dizainerleri men sýretshilerin qatysýǵa shaqyramyz. Óńirimizdiń tarihi, rýhani ereksheligi men salaýatty ómir saltyn ustanýǵa baǵyttaityn, úzdik dep tanylǵan logotip avtoryna «Turan» fýtbol komandasynyń oiyndaryna bir jyldyq tegin bilet syiǵa beriledi. Baiqaýǵa «Coreldraw» baǵdarlamasymen daiyndalǵan, osy jyldyń 10 aqpanyna deiin jiberilgen jumystar qabyldanatyn bolady»,- dedi Sáken Amangeldiuly.
Jańa fýtbol komandasynyń basty ereksheligi – quramy tek jergilikti sportshylardan jasaqtaldy. Iaǵni, shet memleketterden legionerler shaqyrmaidy. Bul – jergilikti talantty fýtbolshylardyń úlken arenaǵa shyǵyp, óz qabiletterin kórsetýge jol ashýǵa múmkindik. Sondai-aq, brifingke qatysqan oblystyq fýtbol federatsiiasynyń prezidenti Hakim Kóshqaliev federatsiia janynan aldaǵy ýaqytta oblystyq fýtbol akademiiasy qurylatynyn jetkizdi.
«Dúniejúzi boiynsha keń taraǵan sport túri - fýtbol Túrkistan oblysynda da keń órkendep, halyqaralyq rangide damityn bolady. Oǵan jýyrda ǵana ashylǵan «Túrkistan arena» stadiony tolyq jaýap bere alady. Óńirimizde otandyq fýtboldy jańǵyrtý maqsatynda Túrkistan oblysynyń fýtbol federatsiiasy quryldy. Bul federatsiianyń basty maqsaty – oblystaǵy balalar men jasóspirimder fýtbolyn damytý. Aldaǵy ýaqytta «Arys» komandasy óz ataýyn «Turan» ataýymen jalǵastyratyn bolady. Jańadan qurylǵan «Turan» fýtbol klýbyna aldaǵy ýaqytta jeńister tileimiz», - dedi oblystyq federatsiia basshysy.
Komandanyń quramyna kelsek, qaqpashylar: Bekjan Toqtarbai, Andrei Pasechenko, Stanislav Pavlov, qorǵaýshylar: Nurlan Dairov, Meiirjan Kambil, Ermek Qýantaev, Gafýrjan Nazarov, Qasymjan Taipov, Mardan Tólebek, Miras Týliev, Elsúier Alpysbai. Al jartylai qorǵaýshylar: Asyljan Abbas, Baqdáýlet Aqbergen, Bekjan Álipbekov, Erkebulan Amangeldi, Bekzat Beisenov, Nurǵaini Býribaev, Abai Júnúsov, Shynbolat Maqsymhan, Aliiar Muhamed, Samat Bortai, Darhan Kaliuly. Sondai-aq, shabýylshylar: Tanat Nóserbaev, Temirlan Amirov, Nkobi Stenli Chisom.
