Túrkistan oblysy, Tólebi aýdanynda 1000 MVt bý-gaz qondyrǵysynyń estelik kapsýlasy salyndy, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Mańyzdy jobanyń tanystyrylymyna «Samuryq-Qazyna» ulttyq ál-aýqat qory» AQ basqarma tóraǵasy Almasadam Sátqaliev, Túrkistan oblysynyń ákimi Ómirzaq Shókeev jáne turǵyndar qatysty.
«Bul joba elimizdiń energetikalyq qaýipsizdigin jáne ulttyq energetikalyq júieniń, ásirese, energiia tapshylyǵy bar ońtústik óńiriniń senimdiligin arttyrady. Ikemdi generatsiialaý rejimi bar aralas tsikldi zaýyttyń qurylysy Qazaqstan Respýblikasynyń energetika júiesine jańartylatyn energiia kózderin biriktirý úshin qolaily jaǵdai jasaidy», – dedi «Samuryq-Qazyna» AQ basshysy.
Oblys ákimi energiia tapshylyǵyn sheshý baǵytyndaǵy bul jobanyń asa mańyzdy ekenin jetkizdi.
«Búgin megajobanyń irgetasy qalanǵaly tur. Óńirge óte aýqymdy investitsiia tartylýda. Memleket basshysy Qasym-Jomart Toqaevtyń «Halyq birligi jáne júieli reformalar – el órkendeýiniń berik negizi» atty halyqqa Joldaýynda Ońtústik aimaqta 1000 MVt energiia óndiretin jańa qýat kózderin iske qosý qajettigin aitqan bolatyn. Mine, búgin Prezidentimizdiń tapsyrmasyn oryndaý maqsatynda óńirimizde mańyzdy jobany júzege asyrý úshin qýaty 1000 MVt bolatyn bý-gaz qondyrǵysynyń irgetasyn qalaǵaly turmyz. Ózderińizge belgili, jyl saiyn elimizde elektr defitsiti baiqalyp keledi. Túrkistan óńirinde energiia tapshylyǵy – óte ózekti másele. Olysqa qajetti elektr qýatynyń 80%-y syrtqy kózderden tasymaldanady. Atalǵan máseleni túbegeili sheshý maqsatynda «Samuryq-Qazyna» AQ-men birlesip, mańyzdy bý-gaz stantsiiasyn (PGÝ) salatyn bolamyz. Bul joba boiynsha oblysqa boljammen 722,8 mlrd. teńge jeke investitsiia tartylady. Endi osy joba iske qosylǵan soń óńirde kásiporyndar kóbeiedi, kásipkerlik dami túsedi. Barshańyzdy qýanyshty sátpen quttyqtaimyn. Jańa elektr ortalyǵy óńirde energiia tapshylyǵyn joiyp qana qoimai, jańa jumys oryndaryn ashýǵa, óndiristi damytýǵa oń serpin beredi», – dedi Ómirzaq Shókeev.
Joba júzege asqanda tek Túrkistan óńirinde ǵana emes, jalpy Qazaqstan Respýblikasynda elektr energiiasynyń sapasyn arttyryp, energetikalyq júieniń teńgerimdiligi men senimdiligin qamtamasyz etetin bolady. Qazir oblysqa qajetti elektr qýaty 320 MVt bolsa, atalǵan joba arqyly qajettilikten úsh ese artyq elektr óndirilmek. Osy arqyly óńir energiia tapshylyǵynan qutylyp qana qoimai, ózge aimaqtardy da qamtamasyz etpek. Oblysta enegriia tapshylyǵy joiylǵan soń iri kásiporyndar men óndiris te damidy degen jospar bar. Joba 2024-2026 jyldary júzege asyrylady. Mamandar bul jobany TMD aýmaǵynda balamasy joq jobalardyń biri dep baǵalap otyr. Qurylys kezinde 2000-nan astam adam jumyspen qamtylsa, qondyrǵy iske qosylǵan soń 200-den astam turaqty jumys oryndary ashylady.
Manevrlik generatsiialaý rejimimen qýaty 1000 MVt bolatyn bý-gazdy qondyrǵy qurylysyn «PGÝ Túrkistan» JShS kompaniiasy júrgizedi. Qazirgi ýaqytta gaz qubyrynyń magistraldyq jelilerine qosýǵa qajetti tehnikalyq sharttary men «KEGOC» AQ elektr jelilerine qosýǵa qýat berý shemasy negizge alynyp, aldyn ala tehnikalyq-ekonomikalyq negizdeme ázirlendi.
