Túrkistan oblysynda belgisiz adamdar taksi júrgizýshisin qorqytyp, kóligin tartyp alǵan. Bul týraly óńirlik Politsiia departamentinen málim etti, dep habarlaidy "Ult aqparat".
Qazyǵurt aýdandyq politsiia bólimine Ordabasy aýdanynyń turǵyny aryzdanǵan. Ol Shymkent qalasyndaǵy taksi firmasyna tiesili kólikpen jolaýshy tasymalymen ainalysady. Aryzynda aitylǵandai, belgisiz 2 jas jigit Qazyǵurtqa aparyp-kelýdi ótingen. Jolda ózin uryp-soǵyp, óltiremin dep qorqytý arqyly 600 myń teńge talap etken. Taban astynan ondai aqsha taýyp bere almaǵan soń, avtokóligin kúsh qoldanyp, tartyp alǵan.
«Jábirlenýshiniń aitýynsha, túngi saǵat 1-2-de jolda júrgen kólikter men adam aiaǵy saiabyrsyǵannan keiin qaltalaryndaǵy pyshaqtarymen qorqytyp, aqsha talap etken. Aqsha bolmaǵan soń, júrgizýshini óltiremiz dep, kúsh qoldana bastaidy. Osy sátte jábirlenýshi júrip bara jatqan kólikten túsip úlgergen. Dene jaraqatyn alǵan júrgizýshi joldan kólik toqtatyp, aýdandyq politsiia bólimine kelgen. Aýdandyq politseiler kúdiktilerdi ustaý boiynsha dereý iske kiristi. Jedel-izdestirý sharalaryn júrgizdi. Jábirlenýshi men kýágerlerden jaýap alyp, kólikti izdestire bastady», - delingen oblystyq PD aqparatynda.
Nátijesinde jábirlenýshiniń kóligi oqiǵa ornynan 50 shaqyrym qashyqtyqta Saryaǵash aýdanynan tabyldy. Kúdiktilerdiń jeke bastary anyqtalyp, bireýi Nur-Sultan qalasyna qashyp bara jatqan jerinen Qordaidan ustaldy. Al, ekinshisi Shymkent qalasyndaǵy jaldamaly páterden quryqtaldy. Kúdikti jas jigitterdiń ekeýi de Saryǵash aýdanynyń turǵyndary, jumyssyz bolyp shyqty. Politseiler tabylǵan kólikti zańdy iesine qaitardy. Atalǵan fakti QR QK-niń 194-baby («Qorqytyp alý») boiynsha tirkeýge alyndy.
«Kúdiktiniń ekeýi de qamaýda. Qazirgi tańda sotqa deiingi tergeý amaldary júrgizilýde. Túrkistan oblysy politseileri azamattarǵa jeke bastaryńyzdyń qaýipsizdigin birinshi orynǵa qoiýǵa keńes beredi. Alys saparlarǵa shyǵarda, jalǵyz júrmeý kerektigin, syrt kelbeti kúdikti, tanys emes azamattarǵa senim bildirmeý kerektigin eskertedi», - dedi politsiiadan.
