Túrkistanda oblys ákimi Darhan Satybaldynyń tóraǵalyǵymen Sybailas jemqorlyqqa qarsy is-qimyl máseleleri jónindegi komissiianyń otyrysy ótti, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Oǵan QR Sybailas jemqorlyqqa qarsy is-qimyl Agenttiginiń Preventsiia qyzmetiniń basshysy Saian Ahmetjanov, komissiia músheleri, quqyq qorǵaý, memlekettik organ jáne jergilikti atqarýshy organ basshylary, oblystyq Qoǵamdyq keńes músheleri men BAQ ókilderi, sondai-aq beinebailanys arqyly qala/aýdan ákimderi qatysty.
Agenttik ár aimaqta beleń alǵan jemqorlyq faktileriniń negizinde Sybailas jemqorlyq táýekelder Kartasyn ázirlegen. Bul týraly málim etken Saian Ahmetjanov Túrkistan oblysynyń táýekelder kartasyna óńirde jemqorlyq jii ushyrasatyn salalar men sheshimin tappai kelgen túitkildi máselelerdiń engizilgenin baiandady.
«Qazirgi tańda Agenttiktiń óńirlerde jumys isteýiniń basty baǵytynyń biri – osy táýekelder Kartasy. Sondyqtan jemqorlyqtyń aldyn alý deńgeiin udaiy jetildirip otyrý asa mańyzdy. Agenttiginiń maqsaty – qylmystyq isti boldyrmaý, aldyn alý. Túrkistan óńirinde jer, sý, jol máseleleri men basqa da áleýmettik jaǵdailarǵa sáikes jumys josparly túrde atqarylýda», – dedi Saian Ahmetjanov.
Komissiia otyrysyna tóraǵalyq etken oblys ákimi Darhan Satybaldy kún tártibinde qaralatyn máselelerge toqtalyp, sybailas jemqorlyqtyń aldyn -alý sharalaryn nyǵaitý – memleket saiasatynyń basym baǵyttarynyń biri ekendigin airyqsha atap ótti.
«Memleket Basshysynyń Sybailas jemqorlyqqa qarsy is-qimyl máseleleri jónindegi keńeste sybailas jemqorlyqpen ymyrasyz kúresý memlekettik saiasattaǵy negizgi basymdyqtyń biri ekenin, zań ústemdigin ornatyp, naǵyz quqyqtyq memleket qurý úshin, eń aldymen, jemqorlyqtyń tamyryna balta shabý kerektigin naqty atap ótti. Jalpy, oblysta sybailas jemqorlyqpen jan-jaqty kúresý máselesi kún tártibinen túsken emes. Búgingi májilis bul osy baǵyttaǵy jumystarda belsendi serpin beretinine senimdimin», – dedi oblys ákimi.
Jiynda sóz alǵan Agenttiktiń Túrkistan oblysy boiynsha Departamentiniń basshysy Qanat Qojahmetov problemalyq máselelerdi sheshýge baǵyttalǵan Karta aiasynda aýmaqtyq departamentpen atqarylǵan jumystardy atady. Komissiia otyrysynda oblys ákiminiń birinshi orynbasary Arman Jetpisbai oblys aýmaǵynda sybailas jemqorlyqtyń aldyn-alý boiynsha atqarylyp jatqan sharalarǵa toqtaldy.
Oblys aýmaǵynda sybailas jemqorlyqtyń aldyn alý jáne joiý boiynsha júieli jumys jalǵasýda. Oblys ákimdigi «Sybailas jemqorlyqtyń aldyn alý jáne oǵan qarsy is-qimyl» úlgilik bazalyq baǵytyn iske asyrýǵa baǵyttalǵan qajetti sharalardy qabyldaǵan. Jobalyq keńse qurylyp, ákimdik qyzmetkerlerinen jobalyq toptar quryldy. Oblystyń barlyq basqarmalary men kvazimemlekettik uiymdarynda sybailas jemqorlyq táýekelderine ishki taldaý júrgizildi. Pilottyq joba retinde, para alý faktisimen kúdikti dep tanylǵandardyń sot otyrysyna sybailas jemqorlyq is-áreketteriniń saldary týraly memlekettik qyzmetshilerdiń sanasyna áser etý maqsatynda áriptesteri qatystyrylýda.
Jiyn sońyn qortyndylaǵan óńir basshysy Darhan Amangeldiuly basqarma basshylary men aýdan/qala ákimderine sybailas jemqorlyq quqyqbuzýshylyqtaryna jol bergen árbir tulǵanyń jaýapkershiligi eskerýsiz qalmaitynyn qatań eskertip, kún tártibinde qaralǵan salalar men máseleler boiynsha naqty tapsyrmalar berdi.
