Maqtaaral aýdanynda bolǵan tótenshe jaǵdaiǵa bailanysty qurylǵan arnaiy komissiia tasqynnan kelgen shyǵyn kólemin esepteýde, dep habarlaidy "Ult aqparat" ákimdikke silteme jasap.
Bilik basshylary tasqyn sý oryn alǵan aýyldardyń halqymen kezdesip, túsindirý jumystaryn júrgizýde. Maqtaaral aýdanynyń ákimi Baqyt Asanov tasqyn sý astynda qalǵan aýyldardyń turǵyndarymen júzdesti. Qaýipsiz aýmaqqa kóshirilgen halyqqa Úkimet tarapynan naqty kómek kórsetiletinin atap kórsetti.
Túrkistan oblysyndaǵy tasqynǵa bailanysty qurylǵan memlekettik komissiiaǵa topan sýdan kelgen shyǵyndy eseptep, aýyldardy qalpyna keltirý, injenerlik jelilerdi jóndeý jáne zardap shekken halyqqa áleýmettik kómek kórsetý júktelgen.
Sonymen qatar, zardap shekken aýyl azamattarynyń árqaisysyna ótemaqy tólenedi.
Ózbekstanmen shekaralas ornalasqan Maqtaaral aýdanyndaǵy 5 aýyldyń 845 úiin sý basty. Jeńis, Órgebas, Dostyq, Jańaturmys, Firdoýsi aýyldaryndaǵy apatty joiýǵa myńǵa jýyq qutqarýshy men 200-dei tehnika tartylǵan.
Sondai-aq, sý astynda qalǵan aýyldardyń kireberisine blok-beketter qoiylyp, josyp ketken jurttyń dúnie-múlkin tártip saqshylary kúzetýde.
Aýdandaǵy 7639 gektar egindik qyzyl sýdyń astynda qalǵan. Bul alqaptyń basym bóligine maqta egililgen. Mamandar naqty shyǵyn kólemin anyqtaý ústinde. Sý alǵan aýyldardyń irgesinde ornalasqan taǵy 5 eldimekendi oblys ákimdigi, oblystyq Tótenshe jaǵdailar departamenti, QazSÝShar jáne aýyl turǵyndarynan quralǵan volonterlerdiń kómegimen sý basý qaýpinen shyǵaryldy. Sonyń ishinde atap ótetin strategiialyq mańyzy zor 14 myńnan astam halqy bar Myrzakent eldimekeni qyzyl sý basýdan aman qaldy.
Jerlesterimen júzdesken Maqtaaral aýdanynyń ákimi áleýmettik jeliler, messendjerler men BAQ arqyly tarap jatqan sý tasqyny jónindegi túrli burmalaýshylyqtarǵa qatysty óz pikirin bildirdi.
«Halyq durys, iaǵni, resmi shynaiy aqparat alýy kerek. BAQ-ta, ásirese áleýmettik jelilerde aýmaqtaǵy jaǵdaiǵa qatysty eldi dúrliktiretin jalǵan aqparattar taralyp jatyr. Eń bastysy, adam shyǵynynan amanbyz. Al, shyǵyndar eseptelip, tolyq óteledi. Jan-jaqtan kómek kórsetip jatqan jerlesterimizge rahmet aitamyn. Oryn alǵan jaǵdaida jalpy jaýapkershilik bolýy qajet, sonyń ishinde jýrnalister de óz jumysyna jaýapkershilikpen qarasa eken»,-dedi aýdan basshysy.
Baqyt Asanov jalǵan aqparat taratqany úshin ákimshilik jáne qylmystyq jaýapkershilikke tartylatyndyǵyn eskertti. Maqtaaral aýdanyndaǵy 24 evakýatsiia oryndaryndaǵy 3500-ge jýyq turǵynnyń búgingi jai-kúii birqalypty. Barlyǵy derlik meditsinalyq tekseristen ótkizilip, jatyn oryn men kórpe-tósekpen tegis qamtylǵan. Olarǵa kúnine úsh mezgil tamaq úlestirilýde. Azyq-túlik pen jeke bas gigienasyn saqtaýǵa qajetti kerek-jaraqtyń bári jetkizilip berilýde. Al, ózge de qajetti zattar men azyq-túlik túrleri árbir evakýatsiia oryndaryna tótenshe jaǵdaiǵa bailanysty jasaqtalǵan ortalyq qoimadan tizim arqyly úlestirilýde. Evakýatsiia oryndary bop bekitilgen mektepter men kolledj, meshitterde ornalasqan turǵyndar osyndai qiyn-qystaý kezeńde qol ushyn sozyp jatqan memleket basshylyǵyna, úkimetke, oblys, aýdan basshylyqtaryna jáne barlyq qazaqstandyqtarǵa shynaiy alǵystaryn aitýda.
