Túrkistan oblysynda diqandar aǵyn sýdyń tapshylyǵynan kóktemgi dala jumystaryn bastai almai otyr.
Shardara aýdanynyń sharýalary jergilikti kanaldardy jóndeý jumystary birneshe aiǵa sozylǵandyqtan, egistikke sý kelmei qalǵanyn aitady, dep habarlaidy "Ult aqparat".
Diqandardyń sózinshe, sý tapshylyǵy máselesi biyl da qaitalanyp otyr. Kanaldardy jóndeý jumystarynyń kesheýildeýinen egistikke sý barmai, sharýalar egin ege almai qalǵan.
«Kanaldardy jóndep jatqan merdiger mekemelerdiń tehnikalary ýaqytyly kelmei qalady ne bolmasa betony bolmai qalady. Sóitip sý berilmeidi. Biyl maqtany egýge keshigip jatyrmyz. Osylai jalǵasa beretin bolsa, merziminde ege almai qalýymyz da múmkin»,- deidi Alataý aýylynyń turǵyny Seisen Qýan.
Máselen. atalǵan aýdandaǵy Qyzylqum men Qazaqstan aýyldarynyń diqandary «Qyzylqum» kanalyn jóndep jatqandarǵa ókpesi qara qazandai. Olardyń jumysty sozbalańǵa salýynan aǵyn sý kelmei, qinalyp qalǵan.
«Biz osy ýaqytta maqta egýimiz kerek edi. Men ózim 46 mln teńge nesie aldym. Silitra, amafos daiyn bizde. Biraq bular sýdy naýryzdyń ony kúnderi berýi kerek edi, bermedi. Maqta egýdi merziminen keshiktirip otyrmyz endi, erteń bankrot bolýymyz múmkin. Jumys múlde júrip jatqan joq. Qatty qinalyp jatyrmyz. Onyń ústine osy «Kóksarai» sý rettegishin salǵan bes jyldan beri jerler sorlanyp, paidaǵa jaramai jatyr», - deidi «Qazaqstan» sharýa qojalyǵynyń tóraǵasy Dmitrii Anafidin.
Mundai qiyndyqtar Maqtaaral aýdanynda da kezdesedi. Myrzashóldiń diqandary kei jerlerde kanaldardy betondaý jumystarynyń saldarynan aryqtarǵa topyraq tolyp, sý barmai qalǵan. Kei jerlerde sý sorǵysh qondyrǵylar tapshylyǵynan diqandar sýdan taryǵyp, kúnkóristen qaǵyldyq deidi.
«Osy jerde 150-den asa sharýa qojalyǵy bar, bárine sý jetpeidi. Qysta da, jazda da jetpeidi bizge»,- deidi jergilikti sharýalar.
Bul máselege orai elimizdiń Ekologiia, geologiia jáne tabiǵi resýrstar ministri Maǵzum Myrzaǵaliev aǵyn sý egistikke jetkenshe 40 paiyzyn joǵaltatynyn aitady. Sondyqtan jappai kanaldardy betondaý jumystary júrgizilýde.
«Jumystardy atqarý barysynda kesteden keshigý bar. Sondyqtan 15-shi sáýirge deiin barlyq josparlanǵan jumystardy atqaratyn bolamyz»,- dedi sharýalarmen kezdesken ministr.
Vedomstvo basshysy sondai-aq, biylǵy jyly elde aǵyn sý tapshylyǵy bolatynyn jetkizdi. Sebebi, kórshi memleketterde de osyndai boljam jasalǵan. Qazaqstan boiynsha 30-ǵa tarta sý qoimalary jóndeýdi qajet etetinin aitady.
