Túrkistan oblysynda Naýryz merekesin toilaýǵa birqatar shekteýler qoiyldy. Bul týraly jýrnalisterge arnalǵan baspasóz máslihatynda oblys ákiminiń orynbasary Sáken Qalqamanov málimdedi, dep habarlaidy "Ult aqparat".
Oblys ákiminiń orynbasary óńirde sońǵy táýlikterdegi epidemiologiialyq ahýaldyń ózgerýine bailanysty osyndai sharalar qabyldanyp jatqanyn atap ótti.
Onyń aitýynsha, sońǵy táýlikte oblysta koronavirýs infektsiiasyn juqtyrǵan 12 jaǵdai tirkelgen. Al, virýstyq pnevmoniiamen taǵy 5 adam aýrýhanaǵa túsken. Sonymen qatar naýryz merekesine orai, Túrkistanǵa ózge óńirlerden tek poiyz, ushaq jáne avtobýspen 11 myńnan astam adam keledi dep boljanyp otyr.
«31-shi naýryzda Túrkistanda Túrkitildes memleketterdiń yntymaqtastyq keńesiniń beiresmi Sammiti ótedi. Sammitke Túrki tildes memleketterdiń barlyq basshylary jáne osy uiymnyń baqylaýshysy bolyp tabylatyn Vengriianyń premer-ministri qatysady. Osyǵan orai, Sammittiń oidaǵydai ótýi úshin koronavirýs indetiniń keń taraýynyń aldyn alý maqsatynda 19-23 naýryz aralyǵynda Túrkistan qalasynda naýryz merekesine arnalǵan sharalar ótkizilmeidi»,- dedi Sáken Qalqamanov.
Aita keteiik, buǵan deiin oblys ortalyǵynda birneshe mádeni is-sharalar ótkiziledi dep josparlaǵan bolatyn. Oblystyń bas sanitar dárigeriniń jańa qaýlysyna sáikes, 19 men 23-shi naýryz aralyǵynda óńirlerdegi aýdan-qalalarda karantin talaptaryn saqtai otyryp, jiyny 50 adamnan aspaityn shaǵyn sharalar ǵana ótedi. Saltanatty sharalarda ákimdik qyzmetkerleri men eriktiler jáne quqyq qorǵaý organdarynan quralǵan mobildi toptar baqylaýǵa alady.
