Túrkistan oblysynda qus tumaýy tirkelgen joq. Bul týraly Túrkistan oblystyq veterinarlyq baqylaý jáne qadaǵalaý aýmaqtyq inspektsiiasy basshysynyń mindetin atqarýshy Nurjan Úsenbaev aitty, dep habarlaidy QazAqparat.
«Búginde Túrkistan oblysynda qus ólim-jitimi bolǵanymen qus tumaýy aýrýy tirkelgen joq. Iá, 273 qus ólimi oryn aldy. Biraq olardyń barlyǵy da jeke aýlalarda 5-6-dan ólgeni anyqtalyp otyr. Olardan synama alynyp, zerthanaǵa jiberdik. Osy ýaqytqa deiin veterinarlyq zerthanaǵa jiberilgen synamalar qus tumaýyna teris nátije berýde. Iaǵni, búgingi kúnge deiin Túrkistan oblysynyń aýmaǵynda eshqandai qus tumaýy tirkelmedi», - dedi Nurjan Úsenbaev.
Sonymen qatar ol óńirde qus tumaýynyń aldyn alýǵa baǵyttalǵan veterinarlyq-sanitarlyq jumystar júrgizilip jatqanyn basa aitty.
Esterińizge sala ketsek, keshe QR Aýyl sharýashylyǵy ministrligi qus tumaýy tirkelgen oblystardyń sany jeteýge jetkenin, onyń ishinde Túrkistan oblysynyń da bar ekendigin habarlaǵan bolatyn.
