Túrkistan oblysynda balalar úii otbasy formatyna kóship, jetimder úii tolyqtai jabylady. Bul týraly búgin oblys ákimi Janseiit Túimebaev málimdedi, dep habarlaidy QazAqparat tilshisi.
«Dástúrli otbasy qundylyqtary saqtalǵan Túrkistan oblysyndaǵy kópbalaly otbasylar ulttyq demografiiaǵa aitýly úles qosyp keledi. Qazir oblysta 130 myńnan astam kópbalaly otbasy bar. Olardyń ishinde 16 500 otbasyǵa 27 nemese 100 myń adamǵa ataýly áleýmettik kómek kórsetiledi. Biyl kópbalaly otbasylaryndaǵy jumyssyz ata-analardyń jumys tabýyna, balalarǵa eńbek naryǵynda básekege qabiletti bolýy úshin qajetti tehnikalyq jáne kásibi bilim berý maqsatynda arnaýly kómek kórsetýdi kózdeitin "Qolǵabys" jobalar keshenin júzege asyramyz. Atap aitqanda, 2019 jyly oblysta "Eńbek jáne nátijeli jumyspen qamtý" baǵdarlamasy sheńberinde 3,3 mlrd teńgege 3700-den astam balaǵa tehnikalyq jáne kásibi bilim granty beriledi. Onyń ishinde kópbalaly otbasydan shyqqan balalarǵa basymdyq beriledi», - dedi Janseiit Qanseiituly.
Aimaq basshysynyń sózinshe, oblystaǵy azamattardy áleýmettik turǵyda demeý úshin atqarylǵan jumystar munymen shektelmeidi.
Máselen, «Eńbek» Nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan memlekettik baǵdarlamasy» aiasynda ótken jyly 69 682 adam qamtylyp, jyldyq jospar 10,1 paiyzǵa artyǵymen oryndalǵan.
Atap aitqanda, 1 160 adam 6,2 mlrd teńgege jeńildetilgen paiyzben shaǵyn nesie alsa, 44 097 azamat jumysqa ornalasty. Qysqa merzimdi kásibi oqýǵa 5 440 adam joldanyp, 4 117 adam turaqty jumyspen qamtyldy. Áleýmettik jumys oryndaryna 4 529 adam joldanyp, onyń 2 818-i turaqty jumysqa ornalastyryldy. Jastar praktikasyna 4305 adam joldandy. Aýyldyq jerlerde birinshi kezekte qajet mamandyqtardy oqytý maqsatynda «Ár aýylǵa óz sheberi» jobasy iske asyrylýda. 2558 azamat 24 biliktilik negizinde oqýǵa joldandy. Jalpy jyl basynan 31 000 jańa jumys orny ashyldy.
Túrkistan oblysyndaǵy densaýlyq saqtaý salasynda úsh mańyzdy másele 100 paiyz sheshimin taýyp otyr.
Onyń birinshisi halyq sany 800-ge deiingi adamdy quraityn 62 eldi mekenge modýldik meditsinalyq pýnkt ornatylyp, medpýnkterge qajettilik máselesi tolyq sheshildi.
Ekinshi oblys turǵyndarynyń túgelimen elektrondyq densaýlyq pasporty jasaldy.
Úshinshi meditsinalyq uiymdardy kompiýtermen qamtamasyz etý 100 paiyzǵa jetti.
Aimaq basshysy jalpy óńirdegi densaýlyq saqtaý salasynda materialdyq-tehnikalyq bazany jaraqtaý, mamandardyń kásibi biliktiligin arttyrý jáne tsifrlandyrý baǵytynda atqarylǵan birqatar jumystarǵa da toqtaldy. Atap aitqanda, Kentaý, Sairam, Saryaǵash aýdandarynda 3 insýlt ortalyǵy ashylyp, oblystyq jedel járdem qyzmeti 37 sanitarlyq avtokólikpen jabdyqtaldy.
Sondai-aq, oblys basshysy Jastar jylynda Elbasy otbasy institýty men qundylyqtaryn damytýǵa erekshe nazar aýdarǵanyn atap ótti. Osy oraida, biyl óńirdegi jalǵyz balalar úii "Otbasy úii" formatyna kóship, jetimder úii tolyǵymen jabylatyny belgili boldy.
