Túrkistan oblysynda esirtki satqan muǵalim 10 jylǵa sottaldy, dep habarlady Polisia.kz.
Báidibek aýdandyq politsiia bólimine jergilikti turǵyndardyń birinen aýdan turǵyny esirtkiniń iri kólemin zańsyz saqtap, ótkizýmen ainalysatyny týraly habarlama kelip túsken.
Jedel ýákilder ustalǵan adamnyń turǵylyqty mekenjaiyn tintý kezinde onyń ashanasyndaǵy shkaftyń ústinen 10 dana bólek paketterge salynǵan hosh iisti, jasyl tústi, esirtkige uqsas zatty taýyp, tárkilep aldy. Sonymen qatar ashana shatyrynyń ústinen aq qapqa salynǵan esirtki zatyna uqsas jasyl tústi zat tapqan.
Saraptama qorytyndysy boiynsha kúdiktiden alynǵan zattar jalpy salmaǵy 3 keliden astam "keptirilgen marihýana" bolyp shyqty. Tergeý barysynda kúdikti esirtki zattaryn satý úshin paketterge bólip salǵanyn moiyndady. Kúdikti qamaýǵa alyndy.
"Kúdiktiden barlyq aiǵaq zat tárkilendi. Jinaqtalǵan is-qujattary aiyptaý aktisimen aýdandyq sotqa joldandy. Sot úkimimen 47 jastaǵy kúdikti Qazaqstan Qylmystyq kodeksiniń 297-babymen kináli dep tanylyp, oǵan 10 jyl merzimge bas bostandyǵynan aiyrý jazasy taǵaiyndaldy", – dep atap ótti tergeýshi Asqar Shýbai.
