Búgin Túrkistan oblysynyń ákimi Ómirzaq Shókeev oblys kásipkerlerimen kezdesti, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Kezdesýde biznes ókilderiniń usynystary men pikirleri, ótinishteri tyńdaldy. Jiynǵa «Atameken» QR Ulttyq kásipkerler palatasynyń basqarma tóraǵasynyń 1-shi orynbasary Maqsat Qiqymov, QR Parlamenti Májilisiniń depýtaty Qainar Abasov jáne óńirlik keńes músheleri, aýdandyq kásipkerler keńesi músheleri, Túrkistan oblysy máslihatynyń depýtattary, memlekettik organdarmen qarjy institýt basshylary jáne kásipkerler qatysty. Óńir basshysy Túrkistan oblysynda shaǵyn kásipkerliktiń áleýeti joǵary ekenine toqtaldy.
«Túrkistan oblysynda halyq sany kóbeiip keledi. Ol – qýanyshty jaǵdai. Endi sol elge qajetti jumys oryndaryn, óndiris oryndaryn kóbeitý – ýaqyt talaby. Túrkistan óńiriniń turǵyndary qashan da kásipkerlikke beiim bolǵan. Kásipkerlik sýbektileri sany jóninen oblysymyz Almaty men Nur-Sultan qalasynan keiin úshinshi orynda tur. Kásipkerler sany jyldyń ózinde 10 myńǵa ósip, 155 myńǵa jetti. Sondyqtan biz kásipkerlikke úlken mańyz berip, «Qarapaiym zattar ekonomikasy» men «Biznestiń jol kartasy 2025» baǵdarlamasy arqyly qoldaý kórsetip otyrmyz. Túrkistandaǵy qurylystardy da jergiliki kásipkerler atqaryp jatyr. Kásipker bolý – óte qiyn. Ol úshin ekonomika, zań, býhgalteriiadan bilim bolýy kerek. Uiymdastyrýshylyq sheberligi joǵary jáne táýekelge bara alatyn azamattar ǵana myqty kásipker bola alady. Biz óńirde «Kásipkerlik qyrandary» atty jobany iske qostyq. Tanymal, iri kásipkerler jas ári izdenis ústinde júrgen kásipkerlerge óz bilgenderin úiretedi. Jobalaryn qarjylandyryp, qoldaý kórsetedi. Bul joba jalǵasyn tabady. Aýdan ákimderine de aýyl-aimaqtan isker, kásipkerlikke beiim jastardy tabý, qoldaý kórseý týraly tapsyrma berildi. Kásipkerlik – ekonomikanyń qozǵaýshy kúshi. Biznes óz kezeginde áleýmettik jaýapkershilikti sezinýi qajet. Eń keregi óńir turǵyndaryn turaqty jumys oryndarymen qamtamasyz etý», – dedi Ómirzaq Shókeev.
Túrkistan oblysy kásipkerler palatasynyń direktory Timýr Naqypbekov kásipkerler palatasy atqaryp jatqan is-sharalar týraly baiandady.
«Túrkistan qalasynda ekinshi deńgeili bankterdiń tolyqqandy filialdarynyń joq edi. Bul másele Ulttyq bank tarapynan qoldaý taýyp, «Halyqbank», «Fortebank», «Jýsanbank», «BankTsentrKredit», «Sberbank» filialdary ashyldy. «Keń dala» baǵdarlamasy aiasynda kóktemgi dala jumystaryna bólinetin qarajat máselesi, jylyjailarda tuqymdar men tyńaitqyshtardy sýbsidiialaýǵa qoldaý kórsetildi. Statistikaǵa júginetin bolsaq, oblysymyzda qazirgi tańda 160 myńǵa jýyq kásipkerdiń 52 paiyzy aýyl sharýashylyǵy salasynda qyzmetterin atqarýda. Biyl Kásipkerler palatasy kásipkerlerge 9 myńnan astam aqparattyq qamtamasyz etý qyzmetin jáne 1 myńnan astam servistik qoldaý qyzmetterin kórsetti. «Atameken-Túrkistan» MQU qazirgi tańda 226 jobany 1,8 mlrd. teńgege qarjylandyrdy», – dedi ol.
Kezdesýdiń kún tártibinde kolledjderdi senimgerlik basqarýǵa berý, Túrkistan indýstriialyq aimaǵynda ornalasqan kásiporyndardyń problemalyq máseleleri, Túrkistan qalasynda qolónershiler ortalyǵyn ashý jáne ózge de máseleler talqylandy. Jeńildetilgen nesie, sýbsidiia túitkilderi de tarqatyldy. Kásipkerler erkin formatta kókeide júrgen suraqtaryn qoiyp, ol usynystar hattamaǵa engizildi.
