Túrkistan oblysynda koronavirýsty infektsiianyń aldyn alý maqsatynda demalys kúnderi monitoringileý jumystary júrgizildi.
Mobildi toptarmen júrgizilgen kúndizgi jáne túngi reid jumystarynyń nátijesinde 1328 nysan tekserilip, karantin talaptaryn buzǵan 206 nysan anyqtaldy, dep habarlaidy "Ult aqparat".
Oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti baspasóz qyzmetiniń málimetinshe, zańbuzýshylyqqa jol bergen 158 jeke tulǵaǵa 30 AEK kóleminde aiyppul salynǵan. 25 jeke kásipkerge hattama toltyrylyp, olarǵa da 230 AEK kóleminde aiyppul tóleý mindettelgen.
Reid barysynda sondai-aq, tyiym salynǵan otbasylyq merekelik is-sharalar anyqtalyp, toqtatylǵan. Máselen, Qazyǵurt aýdanyna qarasty Turbat eldi mekenniń jergilikti turǵyny 32 qonaqty shaqyryp «qyz uzatý» toiynyń ótkizgen. Tólebi aýdanynda da Zaǵambar eldimekeniń turǵyny 50-den asa azamatty jinap, «qyz uzatý» toiyn jasaǵan. Arys aýdanynda 35-40 adamnyń basyn qosyp, 3-betashar men 1-qyz uzatý rásimderi ótkizilgeni anyqtalǵan. Al, Keles aýdanynyń Jolbasshy eldimekeniniń turǵyny 30 qonaqqa betashar ótkizip jatqan. Olardy da mobildik top anyqtap, barlyq otbasylyq is-sharalar toqtatylǵan. Toi ielerine ákimshilik quqyq buzýshylyq týraly hattama toltyrylyp, 30 AEK kóleminde aippul salynǵan. Sonymen qatar Tólebi aýdanynda 4 demalys oryndary jumys istep jatqany belgili boldy. Barlyǵynyń jumysy toqtatylǵan. Ondaǵy kásipkerlerge de 230 AEK kóleminde aiyppul salynǵan.
