Túrkistan oblysynda investitsiia tartý jumystary kúsheitiledi, dep habarlaidy «Ult aqparat» oblys ákimdiginiń baspasóz qyzmetine silteme jasap.
Oblys ákimi Darhan Satybaldynyń tóraǵalyǵymen ótken apparat otyrysynda óńirdegi indýstrialdyq jáne arnaiy ekonomikalyq aimaqtarǵa investitsiia tartý jumystary talqylandy. Sonymen birge indýstrialdyq jáne arnaiy ekonomikalyq aimaqtardy injenerlik-kommýnikatsiialyq infraqurylymmen qamtamasyz etý sharalary jáne tarifterine qatysty túitkilder de tarqatyldly. Óńir basshysy bul salanyń mańyzdy ekenin toqtalyp, investitsiia tartý isin jandandyrýdy tapsyrdy.
«Jalpy birinshi kezekte indýstrialdy aimaqtardyń jer máselesi jáne oǵan qajetti infraqurylym boiynsha bólek-bólek Jol kartalaryn ázirleýimiz kerek. Kásipkerler men investorlar bizdiń óńirde elektr tarifi arzan emes ekenin aitady. Investorlarmen durys jumys isteý qajet. Osyǵan bailanysty tiisti basqarmalar men mekemelerden, basshylardan naqty usynystar kútemin. Aýdan, qala ákimderiniń negizgi indikatorlarynyń biri – investitsiia tartý jáne jańa jumys oryndaryn ashý. Osy baǵytta jumysty jandandyryńyzdar. Indýstrialdy aimaqtar men arnaiy ekonomikalyq aimaqtar kásipkerlikti damytýǵa yqpal etýge tiis», – degen Darhan Satybaldy indýstrialdy aimaqtardy damytý, jumys oryndaryn ashý máseleleri turaqty túrde kún tártibinde turatynyn aitty.
Sonymen birge iri kompaniialar men investorlarǵa qolaily jaǵdai jasap, Túrkistan oblysyna shaqyrý kerektigin jetkizdi. Májiliste Oblystyq energetika jáne turǵyn úi-kommýnaldyq sharýashylyq basqarmasy, Oblystyq investitsiia jáne eksport basqarmasy, Oblystyq qurylys basqarmasy men Tabiǵi monopoliialardy retteý komitetiniń Túrkistan oblysy boiynsha departamentiniń jáne «Ońtústik Jaryq Tranzit» JShS basshylary men ókilderiniń pikirleri tyńdaldy.
Óńir basshysy elektr qýatyna qatysty tarifti tómendetý jáne retteý jóninde jaýapty mekemelermen birlese jumys istep, tiimdi sheshim shyǵarýdy tapsyrdy. Sondai-aq indýstrialdy aimaqtarda jumysty jandandyrý, jańa kásiporyndardy ashý isin kúsheitý jóninde tapsyrma berdi. Indýstrialdy aimaqtardy basqaratyn kompaniialardy ońtailandyryp, naqty nátijege jetý jolynda jumys isteýdi júktedi.
Túrkistan oblysynda 9 indýstrialdy aimaq bar. Olar Maqtaaral, Shardara, Sozaq, Qazyǵurt, Túlkibas, Báidibek, Ordabasy aýdandary men Túrkistan jáne Kentaý qalasynda ornalasqan. Indýstrialdy aimaqtarda quny 24,054 mlrd. teńge bolatyn jáne 2614 jumys ornyn quraityn 56 joba ornalasqan. Onyń ishinde quny 15,542 mlrd. teńge bolatyn jáne 2087 jumys ornyn quraityn 40 joba iske qosylyp, jumys atqarýda. Biyl 266 jańa jumys ornyn ashýǵa múmkindik beretin 7 jobany iske qosý mejelengen.
Óńirde «TURKISTAN» arnaiy ekonomikalyq aimaǵy jumys istep tur. Qazirgi tańda 365 gektar ónerkásiptik aimaǵynyń infraqurylym júieleriniń I jáne III kezeńderiniń qurylys jumystary júrgizilýde. Munda birneshe joba júzege asyrý boiynsha naqty kelisimder bar. Aldaǵy ýaqytta arnaiy ekonomikalyq aimaqqa iri investorlardy tartý kózdelip otyr.
