Túrkistan oblysynda kóshede júrgen eki er adamnan qarý tabyldy, dep habarlaidy "Ult aqparat".
Oqiǵalardyń biri Keles aýdanynda bolǵan. Aýdandyq politsiia bóliminiń jedel ýákili Ramazan Shalqar «Qarý» reidi aiasyndaǵy kezekshiligi barysynda avtoturaqtardyń birinen qolynda qarýǵa uqsas zaty bar jas jigitti kórgen.
«Birden áreket etken politsei, tekserý kezinde turǵynnan «MR-371» markaly tapansha qarýyn anyqtap, aiǵaqty zat retinde tárkilep aldy. Sodan oqiǵa ornyna jedel-tergeý tobyn shaqyrdy. Atalǵan derekti Keles aýdandyq politsiia bóliminiń qyzmetkerleri sotqa deiingi tergep-tekserý tizilimine QR QK-niń 287-babymen («Qarýdy, oq-dárilerdi, jarylǵysh zattardy jáne jarylys qurylǵylaryn zańsyz iemdený, berý, ótkizý, saqtaý, tasymaldaý nemese alyp júrý») tirkedi», - dedi Túrkistan oblystyq Politsiia departamentinen.
Kúdikti jergilikti turǵyn bolyp shyqty. Mal baǵýmen ainalysatyn ol, qarýdy qyrdan taýyp alǵanyn jetkizgen. Saraptama taǵaiyndaldy. Er adamǵa qatysty «qolhat alý» bultartpaý sharasy qoldanyldy.
Osyǵan uqsas taǵy bir jait Abai aýyly kósheleriniń birinde boldy.
«Profilaktikalyq jumys jasap, qyzmette júrgen jedel ýákil Murat Janádilov, kóshe boiynda kúdik týdyrǵan er adamdy toqtatqan. Tekserý kezinde onyń qol sómkesinen gazdy tapansha tabylyp, tárkilenip alynady. Bul jait QR QK-niń 287-babynyń 2-bóligimen tirkeýge alynyp, tergep-tekserý amaldary bastaldy», - delingen baspasóz habaralamasynda.
Politseiler onyń qarýdy ne úshin saqtaǵanyn, basqa da qylmystarǵa qatysy bar-joǵyn anyqtaýda. Oǵan qatysty «kelý týraly mindettemede» bultartpaý sharasy qoldanyldy.
