Túrkistan oblysynda qorǵanys isteri jáne bilim berý salasyndaǵy birqatar sheneýnikter para aldy degen kúdikke ilikti, dep habarlaidy "Ult aqparat" QR Sybailas jemqorlyqqa qarsy is-qimyl agenttigine silteme jasap.
Oblystyq qorǵanys isteri departamentiniń Otyrar aýdany boiynsha tobynyń bastyǵy áshkerelendi. Kúdikti QR Qarýly Kúshterinde qyzmet etý merzimin keshiktirý úshin 80 myń teńge para alǵan.
Jetisai aýdany №15 orta mektebiniń direktory eńbek shartyn uzartý úshin 200 myń teńge mólsherinde para aldy degen kúdikke ilikken.
Eden jýýshy retinde jumysqa qabyldaý úshin 150 myń teńge para aldy degen kúdikpen Maqtaaral aýdany №34 mektebiniń direktoryna qatysty tergeý bastaldy.
Joǵarydaǵy derekter boiynsha sotqa deiingi tergep-tekserý júrip jatyr. Kúdiktilerge qatysty sońǵy sheshimdi sot shyǵarady.
