Túrkistan oblysynda qaraqshylyq shabýyl jasaýmen ainalysqan 2 qylmystyq top músheleri ustaldy, dep habarlaidy "Ult aqparat".
Oblystyq IID baspasóz qyzmetiniń málimetinshe, kúdiktiler Qazyǵurt aýdanynda shetel azamatyna qaraqshylyq shabýyl jasaǵan.
«Kúdiktiler betterine betperde kiip, jataqhanaǵa kirgen. Jábirlenýshini qarýmen qorqytyp, onyń baǵaly zattary men 90 myń teńge kóleminde aqshasyn alyp ketken. Atalǵan oqiǵa boiynsha QR QK-niń «qaraqshylyq» baby boiynsha sotqa deiingi birińǵai tergep tekserý tizimine tirkeldi. Al, qyrkúiek aiynda qylmystyq toptyń bir múshesi sybailasymen atalǵan aýdan turǵynynan jarty million teńge turatyn jylqysyn urlap ketken. Qazan aiynyń basynda osy top Saryaǵash aýdanyndaǵy janar-jaǵarmai beketine qaraqshylyq shabýyl jasaǵan. Betterine betperde kigen kúdiktiler joǵaryǵa oq atyp, kassadan 700 myń teńgege jýyq aqshany qoldy etken», - delingen habarlamada.
Oblystyq IID Kriminaldyq politsiia basqarmasynyń bastyǵy Qurmanbek Sahovtyń sózine qaraǵanda, atalǵan aýyr qylmystardy ashý úshin tájiribeli jedel iz kesýshilerden quralǵan jedel-tergeý toby quryldy.
«Birneshe ai kóleminde kúdiktilerdiń túr-tulǵasy anyqtalyp, olardy ustaý is-sharalary júrgizildi. Bul qylmysty ashýdyń bir qiyndyǵy olar kópshiliginde qylmysyn betterine betperde kiip jasaǵan. Sondyqtan da jábirlenýshiler olardyń túr-tulǵasyn anyq beinelep bere almaǵan. Kriminaldyq politsiia basqarmasynyń qyzmetkerleriniń jedel-izdestirý is-sharalaryn júrgizý nátijesinde Shymkent qalasyndaǵy jaldamaly páterlerden qylmystyq toptyń 6 múshesi anyqtalyp, ustaldy. Kúdiktilerdiń barlyǵy oblystyń turǵyndary bolyp shyqty. Olardan sholaq myltyq, pnevmatikalyq tapansha jáne basqa da aiǵaqty zattar tárkilenip alyndy», - deidi Qurmanbek Sahov.
Sondai-aq, Shymkent qalasynyń turǵyndarynan quralǵan taǵy bir qylmystyq top ustaldy. 8 qazan kúni túnde Túlkibas aýdanyndaǵy turǵynnyń biriniń úiine betterine betperde kigen 6 adam kirip, qarýmen qorqytyp, aqshasyn alyp ketpek bolǵan. Úi iesi qarsylyq kórsetken. Mundaidy kútpegen seziktiler eshteńe ala almai qashyp, oqiǵa ornynda sholaq myltyq qaldyrǵan. Ustalǵandardyń ekeýiniń buryn sottalmaǵany anyqtalyp otyr.
Qazirgi tańda atalǵan jaittar boiynsha Túrkistan oblysy IID tergeýshilerimen sotqa deiingi teregý amaldary júrgizilýde. Kúdiktilerdiń barlyǵy ýaqytsha ustaý abaqtysynda. Politseiler ustalǵandardyń basqa da aýyr qylmystarǵa qatystylyǵyn anyqtaýda.
