Túrkistan oblysynda dári-dármekter men meditsinalyq qurylǵyldardy zańsyz satýdyń 5 faktisi anyqtaldy, dep habarlaidy "Ult aqparat".
Oblystyq Politsiia departamenti baspasóz qyzmetiniń málimetinshe, Túrkistan qalasynyń aýmaǵynda júrgizilgen jedel is-sharalary kezinde politsiia qyzmetkerleri dárihanalardyń biriniń farmatsevtin Tsef III antibiotigin úlken kólemde satyp jatqan jerinen ustaǵan. Ol 336 qoraptyń árqaisysyn (bir qorapta 1 flakon – red.) 1500 teńgeden, jalpy 405 myń teńgege saýdalaǵan. Al, dárihanalardaǵy bir qoraptyń quny – 1300 teńge.
Odan ári, áleýmettik jelilerdi baqylaý barysynda kriminaldyq politsiia qyzmetkerleri Saryaǵash turǵynynyń meditsinalyq maskalardy zańsyz saýdalanǵanyn anyqtady. Turǵynnyń kóligin tekserý kezinde taǵy 4950 dana meditsinalyq maska tárkilendi.
Sol kúni Arys aýdanynda politsiia qyzmetkerleri Askorbin qyshqyly Arys qalasyndaǵy dárihanalardyń birinde 700 teńgeden satylǵanyn anyqtaǵan. Atalǵan preparattyń bólshek saýdadaǵy baǵasy - 300 teńge.
«Barlyq anyqtalǵan faktiler boiynsha tekserý júrgizilip, Qazaqstan Respýblikasynyń zańnamasyna sáikes arnaiy sharalar qabyldanatyn bolady. Óz kezeginde, Túrkistan oblysynyń politsiiasy dári-dármekterdiń qymbat baǵamen, ári zańsyz satylýyna kýá bolǵan azamattardy politsiianyń 102 telefonyna habarlasýǵa shaqyrady», - delingen habarlamada.
