Túrkistan oblysynda biyl 97 kópqabatty turǵyn úidiń qurylysy aiaqtalyp, 6 myń otbasy qonys toiyn toilaidy. Iaǵni, barlyq qarjylandyrý kózderinen 855 myń sharshy metr turǵyn úi (5935) páter paidalanýǵa beriledi. Bul shamamen 100-den astam fýtbol alańynyń kólemine teń. «Nurly jer» memlekettik turǵyn úi qurylysy baǵdarlamasy aiasynda qurylysy júrip jatqan 5, 7,9 jáne 12 qabatty úilerdiń sapasy qatań baqylaýda. Bul týraly Túrkistan oblysy ákimdiginiń baspasóz qyzmeti habarlady.
Jyl basynan beri elimizde 7,7 mln sharshy metr turǵyn úi tapsyrylǵan. Eń joǵary kórsetkish Túrkistan oblysyna tiesili. Bul týraly búgin ótken Úkimet otyrysynda aityldy.
Jyl basynan beri jalpy alańy 365,8 myń sharshy metr baspana paidalanýǵa berildi. Mejelengen jospar 61,6 myń sharshy metrge artyq oryndalǵan. Jáne jospar ótken jyldyń osy merzimimen salystyrǵanda 122,2 % -ǵa oryndalǵan.
Jalpy Túrkistan oblysyndaǵy qurylys jumystarynyń kólemi 7 aida 150 mlrd. teńgege jýyqtady.
Túrkistan oblysynyń ákimi Ómirzaq Shókeev ákimshilik-iskerlik ortalyǵyndaǵy jańa qalada boi kótergen birqatar kópqabatty turǵyn úilerdiń qurylys barysyn qadaǵalap, merdigerlermen kezdesti. Mundaǵy páterler nesielik negizde, kezekte turǵan otbasylarǵa beriledi. Salynyp jatqan úilerdiń qurylysymen tanysqan oblys ákimi merdiger mekemelerge sapaǵa basa nazar aýdarýdy tapsyrdy. Turǵyn úilerdiń infraqurylymy, elektr, jylý júiesi talapqa sai bolýy kerektigin aitqan óńir basshysy qurylys sapasynyń qatań saqtalýyn eskertti.
«Qalanǵan árbir kirpish úshin jaýapy ekenderińizdi esten shyǵarmańyzdar. Úiler talapqa sai, sapaly salynyp, kestege sáikes tapsyrylýy tiis. Syn, eskertpelerdi nazarǵa alyp, úilerdiń ainalasyn abattandyrýǵa basa nazar aýdarý qajet. Gazonmen qatar, aǵashtar egilýi jáne ýaqytymen baptalýǵa tiis», – dedi Ómirzaq Shókeev.
