Túrkistan oblysynda aýyl ákimderin sailaý joǵary deńgeide ótip jatyr. Óńirde 60 aýyldyq okrýginiń turǵyndary óz tańdaýlaryn jasap, belsendilik tanytýda, dep habarlaidy "Ult aqparat".
Búgin óńirdegi 16 aýdan-qaladan jalpy sany 166 úmitker tirkelip, saiasi dodaǵa qatysýda. Aimaqta halyq sany 2 mln 049 myń adam bolsa, onyń 1 mln 160 myńy daýys berýge quqyly. Oblysta 241 sailaý ýchaskesi ashylyp, onda 265 myń adam daýystaryn berýde. Saiasi dodanyń ádil ótýin arnaiy baqylaýshylar baqylap otyr.
Máselen, jańadan qurylǵan Saýran aýdanyndaǵy úsh aýyldyq okrýgte ákimderdi sailaý ótýde. Solardyń biri Úsh qaiyq aýyldyq okrýgine ákim bolýǵa eki úmitker tirkelip, baqtaryn synaýda. Tórt eldimekennen turatyn aýyldyq okrýgte 7 myńǵa tarta halyq tursa, onyń 2896-sy sailaýda daýys berýde.
Al, Arys qalasynda 86 jastaǵy Úsipbek Saparbekov aqsaqal da bir kisidei daýys berdi. Montaitas aýylyndaǵy №20 sailaý chaskesinde tańdaýyn jasaǵan el aǵasy eldi birlikke, úmitkerlerdi el aldyndaǵy sertke adal bolýǵa shaqyrdy. Baiyrqum aýylynyń ardagerler keńesiniń tóraǵasy Jasan Sahov bul sailaýdyń aýyl ómirine tikelei áser etetinin aityp, saiasi dodaǵa joǵary baǵasyn berdi. Óz tańdaýyn jasap, azamattarǵa sáttilik tiledi.
Óz kezeginde Sairam aýdanynda sailaýshylardyń belsendiligi joǵary. Qutarys aýyldyq akrýginde tańǵy 8.20-ǵa deiin 112 adam daýys berip úlgerdi. Eń alǵashqy 5 sailaýshyǵa syilyqtar berildi.
