Túrkistan oblysynda alaiaqtyq jasaǵan degen kúdikpen qyzylordalyq turǵynǵa qatysty qylmystyq is qozǵaldy, dep habarlaidy "Ult aqparat".
Alaiaq Saryaǵash aýdanynyń turǵyndaryn Atyraýǵa jumysqa turǵyzamyn dep aldap soqqany anyqtaldy.
Túrkistan oblystyq PD baspasóz qyzmetiniń málimetinshe, kúdiktini ustaýǵa Saryaǵash aýdany turǵyndarynyń aryzy negiz bolǵan. Olar «Atyraý oblysyndaǵy kompaniialardyń birine jumysqa ornalastyrýǵa ýáde berip, aqsha alyp ketken alaiaqtyń qurbany bolǵany jóninde shaǵymdanǵan. Saryaǵash aýdandyń politsiia bóliminiń qyzmetkerleri kúdiktini qolǵa túsirdi. Ol Qyzylorda oblysynyń turǵyny bolyp shyqty. Tergeý barysynda seziktiniń osyndai 10 alaiaqtyq oqiǵaǵa qatysy bary anyqtaldy.
«Kúdikti jábirlenýshilerdiń senimine kirip, jumys suraǵan adamdardyń árqaisysynan 150-180 myń teńge aralyǵyndaǵy aqsha alyp otyrǵan. Artynsha izin sýytqan. Jábirlenýshilerge keltirilgen shyǵynnyń jalpy somasy eki million teńgege jýyqtaidy. Qazirgi ýaqytta atalǵan jaittar boiynsha »Alaiaqtyq« babymen sotqa deiingi tergeý amaldary júrgizilýde» delingen habarlamada.
Dál osyndai oqiǵa Sairam aýdanynda qaitalandy. Onda kúdikti áleýmettik kómek alýǵa kómektesemin degen jalǵan ýádemen jábirlenýshilerdiń 100 myń teńgesin jymqyryp ketken. Tártip saqshylary jergilikti turǵyndy qolǵa túsirdi, qazir sotqa deiingi tergeý amaldary júrgizilýde.
