Foto: Túrkistan oblysy ákimdigi
Búgin Túrkistanda halyqty jumyspen qamtý jáne jumys oryndaryn qurý, az qamtylǵan otbasylar sanyn azaityp, kásipke baýlý máseleleri talqylanǵan májilis ótti. Jiynǵa jumyspen qamtý basqarmasynyń basshylyǵy men qyzmetkerleri qatysty, – dep habarlaidy «Ult aqparat».
Jiynda baiandamalar men esepter tyńdaldy. Halyqty jumyspen qamtý salasyndaǵy ózekti máseleler men kedeilik kórsetkishin tómendetý sharalary keńinen talqylanǵan jinalysta oblys ákiminiń orynbasary Beisenbai Tájibaev bul baǵyttaǵy jumystardy áli de shirata túsý kerektigin eskertti.
– Biyl bekitilgen indikatordyń tolyq oryndalýyn qamtamasyz etý qajet. Aýdan, qala ákimdigindegi jaýaptylarǵa «Óńirlik jumyspen qamtý kartasynda» kórsetilgen mejelerge qol jetkizýdi tapsyramyn. Múmkindigi shekteýli jandardy jumyspen qamtýdaǵy jáne memlekettik baǵdarlamalardy oryndaý barysynda anyqtalǵan kemshilikter joiylsyn. Kedeilikti tómendetý sharalary júieli túrde júrgizilsin. Ataýly áleýmettik kómek alýshylardyń ishindegi eńbekke jaramdy azamattardyń tabysyn arttyrý maqsatynda jumyspen qamtý sharalarynyń belsendi túrlerine tartyp, turaqty jumysqa shynaiy ornalasýyn qadaǵalańyzdar. Atalǵan kómekti taǵaiyndaýdyń zańdylyǵyna zerdeleý jumystaryn júrgizý kerek. Jumysty shiratyńyzdar. Baiandamada aitylǵan máselelerdi sheshý boiynsha tiisti jumys júrgizilsin. Keibir aýdandarda jumyspen qamtý deńgeii tómen. Aýdandarda jumyspen qamtý baǵytynda nasihat-túsindirý jumystary júrgizilip, málimetter usynylsyn, – dedi B. Tájibaev.
Májiliste oblystyq jumyspen qamtýdy úilestirý jáne áleýmettik baǵdarlamalar basqarmasy basshysynyń mindetin atqarýshy T.Qudaibergenov, oblystyq jumyspen qamtýdy úilestirý jáne áleýmettik baǵdarlamalar basqarmasy basshysynyń orynbasary K. Mirova, oblystyq jumyspen qamtýdy úilestirý jáne áleýmettik baǵdarlamalar basqarmasy basshysynyń orynbasary N.Nurashov ózderine bekitilgen salalar boiynsha baiandama jasady.
Jiyn barysynda oblys ákiminiń orynbasary Beisenbai Tájibaevtyń tarapynan halyqty jumyspen qamtý, jastardy shaǵyn nesieleý jumystaryn uiymdastyrý, az qamtamasyz etilgen azamattarǵa áleýmettik jaǵynan qoldaý kórsetý, múgedektigi bar adamdardyń arnaýly áleýmettik qyzmettermen qamtylýyn retteý jáne de saladaǵy ózge de máselelerdi sheshý jóninde tapsyrmalar berildi. Sondai-aq baiandamada aitylǵan kórsetkishteri tómen aýdandarǵa eskertý berilip, jumysty jandandyrý jóninde tapsyrmalar berildi.
Aita keteiik, Túrkistan oblysynda biyl 118,9 myń jumys ornyn ashý boiynsha oblys basshysynyń bastamasymen «Óńirlik jumyspen qamtý kartasy» bekitildi. Onyń ishinde 108 myń adamdy turaqty jáne ýaqtysha jumys oryndaryna, 3,7 myń adamdy ulttyq jobalar men baǵdarlamalarda ashylatyn jumys oryndaryna joldaý jáne 7,2 myń adamǵa grant pen shaǵyn nesie berý kózdelgen.
Biylǵy I jartyjyldyq josparyna sáikes 69,6 myń adamdy jumyspen qamtý josparlanyp, naqty 60,4 myń adam jumyspen qamtý sharalaryna joldandy. Tiisinshe, I jartyjyldyq jospar 86,8% oryndaldy. Odan bólek, az qamtylǵan azamattardyń tabystaryn arttyrý arqyly kedeilikti tómendetý boiynsha jumystar da jalǵasýda. Biyl 116,2 myń adamdy ataýly áleýmettik kómekpen qamtamasyz etýge biýdjetten 12,2 mlrd. teńge bólindi.
Sondai-aq kedeilik deńgeiin tómendetý jóninde aýdan, qala ákimderimen memorandýmdar túzilip, AÁK kórsetýdiń 2024 jylǵa jospary bekitildi. 1 shildedegi jaǵdaiy boiynsha 13,569 myń otbasyǵa nemese 81,2 myń adamǵa 3,8 mlrd. teńgege AÁK taǵaiyndalyp, az qamtylǵan azamattardyń úlesi oblys halyq sanynyń 3,8%-yn qurap otyr.
Túrkistan oblysynda 99,2 myńnan astam múgedektigi bar azamattar esepte tur. Biyl oblysta múgedektigi bar azamattarǵa áleýmettik qoldaý kórsetý úshin barlyq deńgeidegi biýdjetter esebinen 12,3 mlrd. teńge bólingen.
