Foto: QR TJM
Syrdariiada sýǵa ketken 11 adamnyń toǵyzynyń denesi tabyldy. Qutqarýshylar eki kámeletke tolmaǵan balany izdestirip jatyr, - dep habarlaidy "Ult aqparat" Tótenshe jaǵdailar ministrligine silteme jasap.
"21 tamyz saǵat 17:40-ta Túrkistan oblysy Otyrar aýdanyna qarasty Kóksarai aýylynan 3 km jerde, Syrdariia ózeniniń shomylýǵa ruqsat etilmegen jerinde 11 adam sýǵa batyp ketti.
Qazirgi ýaqytta TJD kúshimen sýǵa batqan 11 adamnyń 9-nyń, onyń ishinde 3 áieldiń jáne 6 kámeletke tolmaǵan balanyń denesi tabylyp, sýdan shyǵaryldy, sondai-aq 2 kámeletke tolmaǵan balany izdestirý jumystary júrgizilip jatyr. Anyqtalǵandai, demalysta 20 adamnan turatyn 4 otbasy bolǵan.
TJD-da jedel shtab quryldy, jedel jeli jumys isteidi (8725 33 5-78-81). Túrkistan oblysy TJD basshylyǵy oqiǵa ornynda jaǵdaidy baqylaýda ustap otyr" - delingen habarlamada.
Vedomstvo málimetinshe, izdeý jumystaryna barlyǵy 150 adam, 18 birlik tehnika, 2 dron jáne 6 júzý quraly, onyń ishinde TJD Jedel qutqarý jasaǵynan 13 qutqarýshy, 3 júzý quraly jáne 3 tehnika, Shymkent q. TJD Jedel qutqarý jasaǵynan 6 qutqarýshy, 1 júzý quraly jáne 1 tehnika, Túrkistan oblysy TJD 50 adam, 2 dron, 5 tehnika, JAO-dan 4 adam, 1 júzý quraly, Politsiia departamentinen 71 adam, 1 júzý quraly jáne 7 tehnika, "103" qyzmetinen 6 adam jáne 2 birlik tehnika jumyldyrylǵan.
Oqiǵanyń mán-jaiyn Túrkistan oblysynyń Politsiia departamenti anyqtap jatyr.
Al Túrkistan oblysy ákimdigi baspasóz qyzmetiniń málimetinshe, turǵyndardan adamdardyń sýǵa batqany týraly habarlama keshe keshki saǵat 18-der shamasynda kelip túsken. Shomylýǵa kelgen 20 adamnyń 11-i sýǵa batyp ketken. Onyń 5-eýi balalar bolsa, 6-y - eresekter.
"Másele oblys basshysy Darhan Amangeldiulynyń tikelei baqylaýynda. Oblys ákiminiń birinshi orynbasary Zulyphar Joldasov pen oblys ákiminiń orynbasary Beisen Tájibaev atalǵan jerde bolyp, nusqaýlyqtar júrgizdi. Qaiǵy jamylǵan áýlettiń úiine baryp, kóńil aitty. Tiisti kómekter uiymdastyrylatyn bolady.
Qutqarýshylar men eriktiler turǵyndarǵa jaz boiy bul jerge sýǵa túsýge bolmaityndyǵy jaily jan-jaqty eskertýler júrgizgen. Anyqtalǵandai, mundai túsindirý jumystaryna dál osy áýlet te qatysqan. Alaida ruqsat etilmegen orynda shomylýdyń zardaby men saqtyq sharalaryn eskermeýdiń saldary osyndai jaǵdaiǵa ulasyp otyr.
Qaza tapqandardyń otbasy men jaqyndaryna qaiǵyra kóńil aitamyz.
Ózderińiz ben otbasy múshelerin qorǵaýǵa jáne tyiym salynǵan jerde shomylmaýdy túsindirýge shaqyramyz" - delingen ákimdik habarlamasynda.
