Jyl basynan Túrkistan oblysyndaǵy eldi meken turǵyndary 325,5 myń gektar jaiylymdyq jermen qamtyldy. Jalpy óńirde 1 mln gektar jerdi qaitarý mindeti qoiylǵan, dep habarlaidy QazAqparat.
Oblystyq jer qatynastary basqarmasynyń basshysy Erǵali Tilegenniń aitýynsha, 2022 jyly eldi mekenderdegi ortaq jaiylym kólemin 1012,0 myń gektarǵa ulǵaitý jospary ázirlenip, eldi mekenderdi ortaq jaiylymmen qamtamasyz etý boiynsha ár aiǵa jospar kestesi bekitilgen.
Búgingi kúni bul jumystar eki baǵytta júzege asyrylýda. Birinshi baǵyt boiynsha maqsatyna sai paidalanylmaǵan 405,2 myń gektar jaiylymdyq jerdi memleket menshigine qaitarý kózdelse, ekinshi baǵyt boiynsha iri jer paidalanýshylarmen memorandým arqyly 606,8 myń gektar jerdi qaitarý josparlanǵan. Al búginde 58,5 myń gektar jer memleket menshigine qaitarylsa, memorandým arqyly 267 myń gektar jaiylym elge berildi.
Sonymen qatar 2021 jyly qurylǵan jumysshy top tarapynan aýdan, qala ákimdikteri boiynsha jaiylym jer ýchaskelerine zerdeleý jumystary júrgizilgen. Nátijesinde 476,2 myń gektar jer maqsatyna sai paidalanylmaǵany anyqtalyp, habarlama berilgen.
Túrkistan oblysynyń ákimi Ómirzaq Shókeev jaiylym jerdi elge qaitarý jumysy jalǵasatynyn jetkizdi.
«Jaiylym qoryn molaitý – óte mańyzdy ári jaýapty másele. Aýdan ákimderi jaýapty basqarmalarmen birlesip jumysty jalǵastyrýy tiis. Bizdiń meje – bir million gektar jaiylymdy qaitarý. Qazirdiń ózinde 30 paiyzy qaitarylyp úlgerdi. Memorandým arqyly jaqsy jumys atqarylyp jatyr. Jerdiń ieleri jaiylymǵa muqtaj jandar ózderiniń aýyldastary ekenin túsinýi tiis. Igerilmei jatqan jerdi eshkim bos qaldyryp qoia salmaidy. Ár ai saiyn osy másele apparat otyrysynda kún tártibine engizilip tursyn. Jaiylym máselesi tikelei qadaǵalaýda bolady», – dedi Ómirzaq Shókeev.
