Túrkistan men Shymkenttiń territorialdyq ózgeristerin iske asyrýǵa biraz qarjy qajet bolady. Ázirshe, ony Úkimettiń rezervinen alady, dep xabarlaidy QazAqparat tilshisi.
QR Qarjy ministri Baqyt Sultanovtyń aitýynsha, shuǵyl sharalarǵa jergilikti biýdjetterdiń qarjysy da jumsalady.
«Bizde Úkimettiń rezervi bar. Aqshanyń bir bóligin sol jerden alamyz. Sosyn jergilikti biýdjetter bar. Taǵy bóligin sodan alamyz. Respýblikalyq biýdjetti naqtylaý kezinde naqty sommany anyqtaimyz dep oilaimyn. Qazir anyq aita almaimyn. Kúzde biýdjetti naqtylaimyz. Oǵan deiin Úkimettiń rezervi men jergilikti biýdjetterdi paidalanamyz. Qarjy shuǵyl qajet bolyp jatsa, atalǵan eki jerden alyp otyramyz», - dedi B.Sultanov jýrnalisterge bergen suxbatynda.
Aita keteiik, QR Prezidenti Nursultan Nazarbaev Túrkistan oblysynyń paida bolýyna bailanysty pikir bildirip, arnaiy qujatqa qol qoiǵan bolatyn. Atalǵan tarihi oqiǵaǵa bailanysty videony AkordaPress áleýmettik jelidegi paraqshasynda jariialady.
«Búgin «Qazaqstan Respýblikasynyń Ákimshilik-aýmaqtyq qurylysy týraly» Zańynyń toǵyzynshy babyna sáikes, Shymkent qalasyna respýblikalyq mańyzy bar qala mártebesin berý jáne oblys ortalyǵyn Túrkistan qalasyna kóshirý týraly Jarlyqqa qol qoiǵaly otyrmyn. Budan bylai bul óńir Túrkistan oblysy dep atalatyn bolady. Osy ákimshilik aýmaqtyń qurylymyna ózgeris engizý arqyly bul óńirdiń órkendeýine tyń serpin berýdi kózdegen tarihi qujat bolyp sanalady», - dep atap ótti Memleket basshysy.
