Elordada «Han Shatyr» saýda oiyn-saýyq ortalyǵynyń janynda Túrkistan jáne Almaty oblystary ákimdiginiń uiymdastyrýymen aýyl sharýashylyǵy ónimderiniń jármeńkesi bastaldy, dep habarlaidy QazAqparat.
«Jyl saiynǵy kúzgi jármeńkeler maýsymy bastaldy. Biz ár oblystaǵy áriptesterimizben tiisti kelisim jasadyq. Búgin kelip otyrǵan eki óńir 800 tonnaǵa jýyq aýyl sharýashylyǵy ónimin jetkizdi, onyń barlyǵy elimizde óndirilgen. Eń bastysy, bul jerde baǵanyń qoljetimdigin baiqaýǵa bolady. Suranys óte joǵary, osyndai jármeńke ár apta saiyn bolady. Qazir etke suranys kóp ekenin kórdik, sony aldaǵy aptada eskeretin bolamyz», - deidi Nur-Sultan qalasynyń ákimi Altai Kólginov.
Ákim qala turǵyndaryn sanitarlyq normalardy buzbaýǵa shaqyrdy.
Jármeńkede Túrkistan oblysy sharýalary 447,2 tonna aýyl sharýashylyǵy ónimin 15-20 paiyz tómen baǵamen usynýda. Atap aitqanda, 34 júk kóligine tielgen 267,7 tonna kókónis, baqsha, kartop, 29,5 tonna jemis-jidek, 72 tonna et jáne et ónimderi, 47,5 tonna sút ónimderi, 10 tonna balyq, 6 tonna bal, 14,5 tonna jemis shyryny men konservi ónimderi qamtylǵan.
Óz kezeginde Almaty oblysy ákiminiń orynbasary Serik Turdaliev ákimdik jármeńkege arnap óńirden ónimderdi jetkizýge qoldaý jasaǵanyn atap ótti.
«Qalyptasqan dástúr boiynsha Almaty oblysynan aýyl sharýashylyǵy ónimerin elordamyzǵa jetkizdik. Osy oraida barlyq aýdan-qalalar taýarlaryn alyp keldi. Nur-Sultan qalasynyń turǵyndary bizdiń ónimdi jaqsy biledi ári kútedi. Bizde eń tańdaýly alma túrleri, balyq pen et ónimderi bar. Qala turǵyndary tarapynan bizdiń taýarlarǵa suranys joǵary ekenin baiqap turmyz. Baǵanyń ózi 15 paiyz shamasynda arzan», - deidi oblys ákiminiń orynbasary.
