Túrkistan qalasynda salynyp jatqan olimpiadalyq rezerv mektebiniń ákimshilik ǵimaraty men jataqhanasynyń qurylysy aiaqtalýǵa jaqyn. 5 qabatty jataqhana atalǵan mektep shákirtterin, stýdentter men qyzmetkerlerdi ýaqytsha baspanamen qamtamasyz etý úshin salynǵan. 200 oryndyq ǵimarat qurylysy qazan aiynda aqtalady. Búginde ishki árleý jumystary júrgizilip, qural-jabdyqtar ornalytýda. Bul týraly Túrkistan oblysy ákimdiginiń baspasóz qyzmeti habarlady.
Sportty damytý baǵytynda Túrkistan qalasynda oblys ákimi Ómirzaq Shókeevtiń bastamasymen jańa sport nysandary boi kótergen. Olardyń qurylysy oblys basshysynyń tikelei baqylaýynda. Nysandardyń qurylys alańynda bolǵan óńir basshysy jaýaptylarǵa jumystardy der kezinde aiaqtap, abattandyrýmen ainalysýdy tapsyrdy. Jaýapty sala basshylarymen kezdesip, jumystyń sapasyna basa nazar aýdarýdy eskertti. Sonymen birge oblys ákimi óńirde sportty damytýǵa qoldaý kórsetý jalǵasa beretinin, bul salanyń mańyzdy ekenin jetkizdi.
Sport salasyna erekshe kóńil bólinip jatqan Túrkistan qalasynda oblys ákimi Ómirzaq Shókeevtiń tapsyrmasymen salynyp jatqan barlyq ǵimarat qalanyń kórki ǵana emes, tarihi kelbeti men bolmysyn saqtai otyryp, zamanaýi arhitektýranyń ozyq jetistikterin paidalanýda.
Túrkistanda «Muz saraiynyń» qurylysy qatar júrip jatyr. Álemdik standarttarǵa sai muz aidyny 1200 adamǵa eseptelgen. Jańa nysan jyl sońynda ashylady. Sondai-aq «Tennis ortalyǵy», B.Sattarhanov sport kesheni, «At sporty kesheni» sekildi jańa sport nysandar boi kóterdi. 35 gektar jerde ornalasqan at sporty kesheninde polo-klýb, manej, stendtik atysqa arnalǵan alańqai, sadaq atýǵa arnalǵan alań, kanal arqyly ótetin kópir men atpen serýendeý aimaǵy bolady.
Óńirde fýtbolǵa airyqsha qoldaý kórsetilip jatyr. 20 gektar jerde ornalasqan «TURAN» fýtbol akademiiasynyń qurylysy da aiaqtalýǵa taiady. Munda sportshylarǵa Eýropanyń úzdik klýbtaryndaǵydai jaǵdai jasalady. Jańa keshende 10 fýtbol alańy bolady. Doping-baqylaý kabinetteri, 300 oryndy qonaqúi bar.
Elimizde teńdesi joq eskek esý kanalyna da sý keldi. Oblys ortalyǵyndaǵy sport kesheniniń qurylysy halyqaralyq talaptarǵa sai júrgizilýde. Jalpy aýdany 100 gektarǵa jýyq alańda ornalasqan sý sporty kesheninde uzyndyǵy 2,5 shaqyrymǵa sozylatyn sý arnasy salyndy. Qurylystyń ekinshi kezeńi aiaqtalǵan soń, munda sapbording, sý shańǵysy, flaibording, veikserfing, kanopolo, dragonbot jáne jaǵajai fýtboly, voleibol, gandbol, regbi sekildi sý jáne jaǵajai sportynyń tanymal túrlerinen saiystar ótedi. Eskek esý sportyn jan-jaqty damytýǵa múmkindik jasalady. Bul sport túrinen Túrkistan oblysy respýblikada kósh bastap tur.
