Túrkistan halyqaralyq áýejaiy alǵash ret áýeailaqtyń jaramdylyq sertifikatyn aldy, dep habarlaidy QazAqparat.
QR Indýstriia jáne infraqurylymdyq damý ministrligi Azamattyq aviatsiia komitetiniń málimetinshe, atalǵan tekserý kezinde áýejaidyń tehnikalyq bazasy men jabdyqty sertifikattalýy, áýeailaq basshylyǵynyń jáne barlyq qyzmetter men jabdyqtardyń qujattamasy zerttelgen.
«Sondai-aq, sertifikattyq tekserý kezinde áýeailaqtyń fizikalyq sipattamalary men áýeailaq jasandy jabyndarynyń jaǵdaiy, belgilenýi, kedergilerdi shekteý jáne esepke alý men ushýdy ornitologiialyq qamtamasyz etý, elektrmen jabdyqtaý men ushýdy elektrli jaryqpen tehnikalyq qamtamasyz etý jaǵy qaralǵan.
Aviaotynmen qamtamasyz etý men ushýdy avariialyq-qutqarýmen qamtamasyz etýge, áýeailaqqa qyzmet kórsetý jáne kútip-ustaýǵa, áýeailaqtaǵy qaýipsizdikti qamtamasyz etý men ushý qaýipsizdigin basqarý júiesine mán berilgen. Áýe kemelerine jerdegi qyzmet kórsetý men jolaýshylar men bagajǵa qyzmet kórsetý, áýe kemelerin muzdan tazartý men aviatsiialyq qaýipsizdik jáne ushý qaýipsizdigin meditsinalyq qamtamasyz etý jaǵy tekserilgen. Sertifikattyq tekserý aiaqtalǵannan keiin Qazaqstannyń aviatsiialyq ákimshiligi áýeailaqtyń jaramdylyǵy sertifikatyn tapsyrdy.
Osylaisha Túrkistan áýejaiy ishki jáne halyqaralyq reisterdi, sonyń ishinde júk tasymaldaý reisterin qabyldaý múmkindigine ie boldy», - delingen aqparatta.
Bul QR IIDM Azamattyq aviatsiia komitetiniń, Qazaqstannyń aviatsiialyq ákimshiliginiń, Túrkistan oblysy ákimdiginiń jáne «YDA» túrik kompaniiasynyń paidalanýǵa berýge daiyndyq jumysynyń 9 ai ishindegi birlesken jumysynyń nátijesi bolmaq.
Aita keteiik, Túrkistan halyqaralyq áýejaiy jańadan jobalanǵan, salynǵan jáne paidalanýǵa berilgen eldegi alǵashqy áýe ailaǵy sanalady.
1 jeltoqsanda «Fly Arystan» áýe kompaniiasynyń inaýgýratsiialyq reisin iske qosý josparlanýda. Reister kún saiyn Nur-Sultan jáne Almaty qalalarynan Túrkistanǵa oryndalatyn bolady. Sondai-aq, «Qazaq Air» áýe kompaniiasy óz áýe kemelerin Túrkistan qalasynyń áýejaiyna ornalastyrýdy josparlap otyr.
