Túrkistan oblysynyń ákimi Ómirzaq Shókeev Úkimet otyrysynda Túrkistan qalasynyń damý barysyn baiandady, dep habarlaidy "Ult aqparat".
«Túrkistan qalasyn túrki áleminiń mádeni-rýhani ortalyǵy retinde damytý jónindegi bas jospar tujyrymdamasyn maquldaý týraly» Elbasynyń 2018 jylǵy 29 qyrkúiektegi № 762 Jarlyǵy negizinde Túrkistan qalasynyń Bas jospary jobasy ázirlendi. Bastapqy qala aýmaǵy 19 627 gektar bolsa, qala shekarasyna ózgerister engizý arqyly jobalaý aýmaǵy 22 370 gektarǵa ózgertiledi», - dedi Ómirzaq Shókeev Úkimettiń búgingi otyrysynda.
Bas jospar boiynsha, birqatar jobalyq kezeńder qabyldanǵan: bastapqy jyl – 2018 jyl, birinshi kezeń – 2025 jyl jáne eseptik merzim – 2035 jyl.
Qala halqy 2018 jyly 165 myń adamdy qurasa, qazir – 176,2 myń adam turady. Bas josparǵa sáikes, 2025 jylǵa – 250 myń adam, 2035 jylǵa – 350 myń adam jáne 2050 jylǵa – 500 myń turǵyn josparlanǵan.
«Qala jobasy ákimshilik-iskerlik ortalyq, rýhani-mádeni ortalyq, turǵyn alaptary, jańa qurylys alańdary, óndiristik jáne tabiǵi-rekreatsiialyq aýmaqtar bolyp birneshe bólikke bólinedi. Qalanyń shyǵys baǵytyndaǵy jańa ákimshilik-iskerlik ortalyq 1450 ga aýmaqty qamtidy. Onda bilim berý, densaýlyq saqtaý, mádeni jáne sport nysandary, halyqqa qyzmet kórsetý ortalyqtary, turǵyn úi keshenderi, ákimshilik ǵimarattar kesheni, biznes ortalyqtary, keńseler, bankter jáne basqa da nysandar salý kózdelgen. Búginde ákimshilik iskerlik ortalyǵynda josparlanǵan 14 nysan tolyq aiaqtalyp, qala kelbetine sáýlettik dizain berýde», - dep atap ótti oblys basshysy.
Túrkistan qalasynyń mádeni-rýhani ortalyǵy 290 ga alqapty quraidy. Onda Áziret Sultan qoryq murajaiy, Kerýen sarai, Tuńǵysh Prezident saiabaǵy, N.Nazarbaev alleiasy jáne jeke salymshylar tarapynan bes juldyzdy úsh qonaq úi syndy iri jobalar salynyp jatyr.
«Búgingi tańda mádeni-rýhani ortalyqta Bas josparda jobalanǵan 10 nysannyń altaýy tolyq aiaqtaldy, qalǵan nysandar bekitilgen josparǵa sáikes qoldanysqa beriledi. Atalǵan nysandar qalanyń tarihi ótkeni men zamanaýi búgingi túrlengen kelbetin kórsetedi. Ortalyq qalaǵa kelýshi týrister men qala qonaqtary tamashalaityn negizgi týristik baǵyt bolady», - dedi Ó. Shókeev.
Qala aýmaǵyndaǵy kógaldandyrý kólemi ázirge 187 ga jetip otyr. Eseptik merzimge qarai 1539 ga nemese 44 m2/adam deńgeiine jetkizý josparlanǵan.
«Tujyrymdamaǵa sáikes, qalanyń klimattyq jaǵdaiyn eskere otyryp, qala syrtynda kógaldandyrýdyń úzdiksiz júiesin jáne Syrdariia ózeniniń tabiǵi ósimdikter dúniesimen birigýdi qamtamasyz etetin jasyl beldeý qalyptastyrý kózdelgen. Budan basqa, qala turǵyndaryn ómir súrý deńgeii men sapasyn jaqsartý maqsatynda qajetti injenerlik infraqurylym júieleri men talapqa sai áleýmettik nysandar boi kóteretin bolady», - dedi Ómirzaq Shókeev.
