Álipbek Óserbaev Túrkistan ákimi bolyp taǵaiyndaldy, - dep habarlaidy "Ult aqparat" oblys ákimdiginiń baspasóz qyzmetine silteme jasap.
"2018 jyldyń 21 maýsymynda Túrkistan oblysynyń ákimi Janseiit Túimebaevtyń ókimimen QR Prezidenti ákimshiliginiń jáne Túrkistan qalalyq máslihatynyń kelisimimen Túrkistan qalasy ákimi bolyp Álipbek Sháripbekuly Óserbaev taǵaiyndaldy", - delingen ákimdiktiń saitynda.
Oblys basshysy qala aktivimen ótkizilgen bas qosýda oblys ortalyǵy bolyp Túrkistan qalasynyń bekitilýimen quttyqtap, qala basshysyn tanystyrdy.
Álipbek Sháripbekuly Óserbaev 1961 jyly týǵan, bilimi joǵary, mamandyǵy boiynsha biliktiligi injener-himik-tehnolog. Eńbek jolyn 1983 jyly Qaraǵandy asbest-tsement ónimderin shyǵaratyn zaýytynyń mashinisti retinde bastaǵan.
1986-2014 jyldary Túrkistan qalasy qurylys detaldary men konstrýktsiialary kombinaty zerthanasynyń injeneri, masteri, ekonomisti, tseh bastyǵy, bas injeneri, "Qýat Sýindýstriia" AQ, "KazakhConstruction Industry" AQ Túrkistan qalasy rýdasyz materialdar kombinaty filialdarynyń direktory, Túrkistan qalalyq máslihaty hatshysynyń mindetin ýaqytsha atqarýshy, Túrkistan qalasy qurylys bóliminiń meńgerýshisi, Kentaý, Túrkistan qalalary ákimderiniń orynbasary, Túrkistan qalasynyń ákimi, oblystyq kásipkerlik jáne indýstriialdy-innovatsiialyq damý basqarmasynyń basshysy, Ońtústik Qazaqstan oblysy Túrkistan qalasynyń ákimi bolyp laýazymdaryn atqarǵan.
2017 jyldyń jeltoqsan aiynan bastap Ońtústik Qazaqstan oblysy ákiminiń birinshi orynbasary laýazymynda qyzmet etip kelgen.
Óńir basshysy Janseiit Qanseiituly tarihi ári syndarly kezeńde Túrkistan qalasynyń ákimine jáne ákimdik qurylymdaryna artylatyn jaýapkershiliktiń júgi aýyr jáne birlesip atqaratyn sharýanyń kóp ekendigin ekendigin jetkizdi.
Sondai-aq, qala ákimine Túrkistan qalasynyń Bas josparyn tezdetip ázirleýdi, zaman talabyna sai qalanyń damý dinamikasyn odan ári arttyrýǵa qajetti baǵyttardy jetildirýdi jáne turǵyndar men týristerge qolaily jaǵdai jasaý maqsatynda qalanyń infraqurylymyn qalyptastyrý tapsyryldy.
