Túrkistan qalasynyń ákimi Rashid Aiýpov ákimdik ǵimaratynyń satylýyna qatysty tikelei efirge shyǵyp, málimdeme jasady.
Birqatar buqaralyq aqparat quralynda Túrkistan ákimdiginiń tórtqabatty ǵimaraty aýktsionda 313 mln teńgege satylǵany, nysanǵa birshama ýaqyt buryn ǵana 257 mln teńgege jóndeý júrgizilgeni habarlandy. Ǵimarat quny jasandy túrde 30 paiyzǵa arzandatyldy degen kúdikpen prokýratýra sotqa júgingen. Sot satý-satyp alý kelisimshartyn zańsyz dep tapty.
«Birinshiden, qala ákimdiginiń burynǵy ǵimaratyna qatysty rasynda da qalada sammit kezinde qonaq úilerdi kóbeitý máselesi týyndaǵan. Osy boiynsha janyndaǵy «Evraziia» qonaq úiine jáne basqa jerlerge de usynǵan bolatynbyz. «Túrkistan» áleýmettik kásipkerlik korporatsiiasy arqyly jasaý da qarastyryldy. Biraq, sheshim ózgerip, aýktsion arqyly satylatyn bolyp sheshildi. Ǵimarattyń baǵasyn shyǵarý ákimdiktiń quqyǵynda emes, arnaiy mekemeniń quzyrynda. Sol boiynsha ǵimarattyń baǵasyn shyǵarǵan bolatyn», - dedi qala ákimi.
Aiýpov 1970 jyly salynǵan ákimdik ǵimaratyna (jalpy aýmaǵy 2554,7 sharshy metr) 257 mln teńgege jóndeý júrgizilgenin rastady. Biraq jóndeý úsh jyl buryn jasalǵan.
«Ǵimaratqa 2018 jyly 257 mln teńge kóleminde jóndeý júrgizilgen, sol baǵa boiynsha qosylǵan jáne de ol QR Qarjy ministrligine qarasty veb portalǵa engizilgen edi. Ol jerdegi satyp alýshyny da, satyp alýǵa qatysýshyny da jáne onyń baǵasyn qadaǵalaityn ákimdik emes. Jalǵyz sol portal arqyly naryqtyq júiemen jasalady.
Iaǵni, eń birinshi aǵylshyn júiesimen baǵanyń kóterilýi boiynsha oǵan birneshe adam tirkeldi. Biraq, oǵan eshqandai saýda bolmaǵan. Ekinshi aýktsion baǵany tómendetý boiynsha ótti.
Aýktsion bastalǵan kezde biz portalda kimniń tirkelgenin kóre almaimyz. Sol kisi tómendetý knopkasyn basý arqyly satyp aldy.
Biraq, qosymsha aityp ketý kerek, usynylǵan baǵadan bir tiyn da tómen túsken joq. Sondyqtan prokýratýranyń aitqanyna kelispeimiz. Sol sebepti birinshi kelisimshartty buzý týraly sheshim shyqqanymen, biz ary qarai apelliatsiialyq sotqa shaǵym jazdyq. Biz ary qarai da sottasatyn bolamyz. Óitkeni, bir qyzyǵýshy adam almady dep satyp alýshynyń artynan qýdalaýdyń qajeti joq dep oilaimyn», - dedi Túrkistan basshysy.
Aita ketsek, Rashid Aiýpov buǵan deiingi suhbattarynda Túrkistan qalasy ákimdiginiń qazirgi ǵimaraty mýzeidiń ǵimaraty emes, qurylǵan kezden bastap ákimdikke tiesili bolǵanyn aitqan edi. Mýzei ǵimarattyń ishinde biraz ýaqyt ornalasqanymen, bul ákimdik ǵimaraty bolyp kelgenin, sondyqtan da osynda kóshý sheshimi qabyldanǵan. «Bólimderdiń jaqsy otyrǵany kerek pe, álde bizge Túrkistannyń damyǵany kerek pe?!... Qazir qalalyq bólimder ǵana emes, basqa da kóptegen organdar óz ǵimarattarynda otyrǵan joq», - degen bolatyn ol.
Túrkistan oblysy ákiminiń 2019 jylǵy hattamalyq tapsyrmasyna sáikes, Túrkistan qalasyna keletin týristerge qolaily jaǵdai jasaý úshin ǵimaratty zamanaýi qonaqúi retinde paidalaný júktelgen. Osy maqsatta, ákimdik ǵimaraty elektrondyq saýda-sattyqqa qoiyldy.
