12 naýryzda Túrkimenstanda kezekten tys prezident sailaýy ótedi. Ortalyq sailaý komissiiasynyń ókili senbi kúni osylai dep málimdedi. Buǵan deiin prezident Gýrbangýly Berdimuhamedov otstavkaǵa ketetinin meńzegen.
"Prezident 12 naýryzdaǵy kezekten tys prezident sailaýyna daiyndalý týraly buiryq berdi" dedi komissiia ókili Bezergen Garraev AFP agenttigine.
Bir kún buryn Berdimuhamedov senattyń kezekten tys otyrysynda "jas basshylarǵa" jol berýge daiyn ekenin málimdep, otstavkaǵa ketetinin meńzegen. Osyǵan deiin onyń bilikti ulyna tapsyrýǵa daiyndalyp jatqany týraly túrli sybys taraǵan.
11 aqpan kúngi senat otyrysy avtoritar basshy Berdimuhamedovtiń bilikte otyrǵanyna 15 jyl tolǵan kúni ótken.
"Elimizdiń damýynyń jańa kezeńinde memleketti basqarý tizginin rýhani ortada jańa zamannyń joǵarǵy talaptaryna sáikes tárbielengen jas basshylarǵa berý kerek degen oidy quptaimyn" dedi ol.
Berdimuhamedov bilikti uly Serdar Berdimuhamedovke berýge daiyndalyp jatyr degen sybys bir jyldan beri tarap jatyr. Zań boiynsha, jasy keminde 40-qa jetken adam prezident bolyp sailana alady. Biyl qyrkúiekte 40-qa tolatyn Serdar Berdimuhamedov prezidenttikten úmitker bola alady.
Ol byltyr premer-ministrdiń orynbasary qyzmetine taǵaiyndalǵan. Bul ol atqaryp otyrǵan birneshe resmi qyzmettiń biri.
Eger ol ákesiniń muragerine ainalsa, álemdegi eń iri shikizat qoryna ie bolǵanyna qaramastan Eýraziiadaǵy eń kedei jáne jabyq elderdiń birine ainalǵan memleketti basqarady. Elde azamattardyń aqparatqa qol jetkizý quqyǵy qatty baqylanady jáne Ashǵabatty synaǵan sheteldik aqparat quraldary buǵattalady. Facebook, Twitter, Youtube siiaqty iri jeliler men táýelsiz aqparat agenttikteri uzaq jyldardan beri jabyq.
Juma kúngi senat otyrysyna Serdar Berdimuhamedov te qatysyp, 2052 jylǵa deiingi ulttyq ekonomikany damytý josparyn tanystyrdy. 30 jyldyq jospardyń mazmuny jariialanǵan joq jáne Gýrbangýly Berdimuhamedov bilikten naqty qashan ketetinin de aitqan joq.
Gýrbangýly Berdimuhamedov tusynda el ekonomikasy tiimsiz basqaryldy. Elde jeke basqa tabyný kúsheidi. Memlekettik aqparat quraldary prezidenttiktiń "jetistikteri" – onyń kólik jarysyna qatysýy men shyǵarmashylyqpen ainalysýy siiaqty isterin negizgi jańalyq retinde taratty. Sonyń saldarynan Berdimuhamedov Batysta kelemejge ainaldy.
Berdimuhamedov 2007 jyly prezident Saparmurat Niiazov qaitys bolǵannan keiin nátijesi burmalanǵan sailaýdan soń bilikke kelgen. 1991 jyly Sovet odaǵy qulaǵannan keiin táýelsizdigin jariialaǵan Túrkimenstanda birde-bir sailaý ádil ári erkin ótken joq.
