Túrkimenstan prezidenti Gýrbangýly Berdimuhamedov bilikti "jas basshylarǵa" berýge daiyn ekenin málimdedi. Buǵan deiin onyń bilikti ulyna tapsyrýǵa daiyndalyp jatqany týraly túrli sybys-qaýeset taraǵan.
64 jastaǵy avtoritar basshy mundai málimdemesin 11 aqpan kúngi parlamenttiń joǵarǵy palatasy Halyq máslihaty otyrysy kezinde aitty. Jiyn Túrkimenstan basshysynyń bilikte otyrǵanyna 15 jyl tolýyna orai uiymdastyrylǵan.
Berdimuhamedov bilikti qyrkúiekte 40 jasqa tolatyn uly Serdar Berdimuhamedovke berýge daiyndalyp jatyr degen sybys bir jyldan beri tarap jatyr. Zań boiynsha, jasy keminde 40-qa jetken adam prezident bolyp sailana alady. Serdar Berdimuhamedov byltyr premer-ministrdiń orynbasary qyzmetine taǵaiyndalǵan. Bul ol atqaryp otyrǵan birneshe resmi qyzmettiń biri.
Eger ol ákesiniń muragerine ainalsa, ol álemdegi eń iri shikizat qoryna ie bolǵanyna qaramastan Eýraziiadaǵy eń kedei jáne jabyq elderdiń birine ainalǵan memleketti basqarady.
Juma kúngi senat otyrysyna Serdar Berdimuhamedov te qatysyp, 2052 jylǵa deiingi ulttyq ekonomikany damytý josparyn tanystyrdy. 30 jyldyq jospardyń mazmuny jariialanǵan joq jáne Gýrbangýly Berdimuhamedov bilikten naqty qashan ketetinin de aitqan joq.
