Dohadaǵy "Taliban" kelissózshileriniń basshysy Mýlla Abdýl Ǵani Baradar
Túrkimenstan, Ózbekstan jáne Resei diplomattarynan turatyn delegatsiialar Qatarda tálipterdiń saiasi máseleler jónindegi komissiiasy basshysymen kelissóz ótkizdi. Tálipter Aýǵanstanda kóp jerdi basyp alyp jatqandyqtan, aimaq halqynyń alańdaýshylyǵy údep barady.
Qozǵalys basshylarynyń biri Abdýl Ǵani Baradar sársenbide eldegi jaǵdaidy talqylaý maqsatynda Qatarda Túrkimenstan syrtqy ister ministriniń orynbasary Vepa Hadjievpen jáne Ózbekstan prezidentiniń Aýǵanstandaǵy ýákili Ismatýlla Irgashevpen kezdesken. Bul jóninde 12 tamyzda "Taliban" qozǵalysynyń resmi ókili Zabiýlla Mýdjahid Azattyqqa habarlady.
Mýdjahidtiń aitýynsha, kelissóz kezinde aimaqtyq máseleler, sonyń ishinde Aýǵanstan men Ortalyq Aziianyń burynǵy sovettik respýblikalary arasyndaǵy saýda jaiy talqyǵa túsken.
Tálipter kelissózshileriniń Qatar astanasy Dohadaǵy ókili 11 tamyzda Twitter-de Baradar men Hadjievtiń "ekijaqty máselelerdi, shekara jaiyn, ekonomikalyq jobalardy jáne Túrkimenstannyń Aýǵanstandaǵy diplomatiialyq missiiasynyń qaýipsizdigin" talqylaǵanyn jazdy.
Twitter-degi basqa bir habarlamasynda tálipterdiń ókili Sýhail Shahin Baradardyń Resei prezidentiniń Aýǵanstan boiynsha arnaiy ýákili Zamir Kabýlovpen kezdeskenin habarlady.
Ótken aida "Taliban" ókili Azattyqqa qozǵalys delegatsiiasy Ashǵabatqa baryp, túrkimen resmi tulǵalarymen "eki el arasyndaǵy ekonomikalyq jáne saiasi bailanystar, qaýipsizdik jáne shekara máselelerin" talqylaǵanyn aitqan.
Túrkimenstan men Aýǵanstan arasyndaǵy shekara uzyndyǵy – 800 kilometr.
Budan buryn AQSh prezidenti Djo Baiden Aýǵanstandaǵy Amerika áskeri qyrkúiekke deiin bul elden ketetinin málimdegen. Osy kún jaqyndaǵan saiyn tálipter Aýǵanstannyń áskeri kúshterine shabýyldy údetip, aimaqtarǵa jáne shekara ótkelderine baqylaý ornatyp jatyr.
Aqparat kózderiniń habarlaýynsha, júzdegen aýǵan, sonyń ishinde áskeriler men politseiler Ortalyq Aziianyń kórshiles elderine qashyp ketken.
Soǵysta tálipterdiń jeńiske jetýi Kabýldaǵy Batys qoldaýyna súienetin úkimet qulaýy múmkin degen qorqynyshty údete tústi.
