2 maýsymda Túrkimenstannan 490 qandas Qazaqstanǵa kóship kelýi tiis bolǵan, alaida olar kelmedi. Qazaqstan syrtqy ister ministrligi beisenbi kúni tústen keiin Azattyqqa kósh maýsym aiynyń sońyna aýystyrylǵanyn habarlady.
"Marshrýt pen basqa da uiymdastyrý máselelerin egjei-tegjei qosymsha kelisý qajettiligine bailanysty etnikalyq qazaqtardy jóneltýdi maýsym aiynyń sońyna aýystyrý týraly Qazaqstan jáne túrkimen taraby birlesip sheshim qabyldady" dedi ministrliktiń resmi ókili Aibek Smadiiarov.
2 maýsymda túske deiin Mańǵystaý oblysy ákimdiginiń jumyspen qamtýdy úilestirý jáne áleýmettik baǵdarlamalar basqarmasynyń basshysy Áset Shopanov kósh "belgisiz merzimge shegerildi" degen edi.
– Belgisiz ýaqytqa shegerildi. Biz onyń ýaqytyn bilmeimiz. Naqty sebebin de bilmeimiz, – deidi Áset Shopanov.
Aqparatqa qaraǵanda, jolaýshylardy Túrkimenstannyń temir jol kompaniiasy Túrkimenbashydan "Bolashaq" stantsiiasyna jetkizip, odan ári qarai qazaqstandyq temir jol kompaniiasy olardy Jańaózenge jetkizýi tiis bolǵan. Alaida olardy jetkizetin kún qarsańynda túrkimen qazaqtar kóshiniń shegerilgeni habarlandy. Olardy Qazaqstanda kútip alǵysy keletin týystaryna eshkim eshteńe aitpaǵan. Keibiri olardy kútip alý úshin maýsym basynda Jańaózenge de barǵan.
"Otandastar" qorynyń málimetinshe, byltyr aqpanda Túrkimenstannan – 153 qazaq, mamyr aiynda - 256, shildede 241 qandas Qazaqstanǵa oralǵan. Olardyń basym bóligi Mańǵystaý oblysyna, az bóligi Jambyl oblysy men Almaty qalasyna qonystanǵan.
Qazaqstan 1991 jyldan bastap sheteldegi qazaqtardy elge ákele bastaǵan. Sodan beri elge bir millionnan astam qazaq oralǵan.
Sániia Toiken, Azattyq radiosy
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
