Túrkiianyń Antalia qalasynda animator bolyp jumys istegen 18 jastaǵy Qazaqstan azamaty jol-kólik oqiǵasy saldarynan kóz jumdy. Qaiǵyly oqiǵa 15 maýsym kúni bolǵan, dep habarlaidy ult.kz.
Qazaqstan Respýblikasy Syrtqy ister ministrliginiń málimetinshe, Antaliadaǵy Bas konsýldyq marqumnyń denesin elge qaitarýǵa bailanysty barlyq qajetti konsýldyq-quqyqtyq kómekti kórsetken.
«Qazaqstan Respýblikasynyń Antaliadaǵy Bas konsýldyǵy qujattardy rásimdeý jáne túrik quzyrly organdarymen birlesip azamattyń denesin elge jetkizýdi uiymdastyrý boiynsha barlyq qajetti jumystardy atqardy», – dep habarlady vedomstvo.
Marqumnyń denesi Qazaqstanǵa 17 maýsymda jetkizildi. Repatriatsiia jumys berýshi men seriktes uiymdardyń qarjylai qoldaýymen júzege asyrylǵan.
Syrtqy ister ministrligi bul máseleniń Bas konsýldyqtyń turaqty baqylaýynda ekenin atap ótti. Qazirgi ýaqytta qazaqstandyq diplomattar Túrkiianyń quzyrly organdarymen ózara is-qimyldy jalǵastyryp jatyr.
