Jaidarman tek qazaq eliniń ǵana emes, túrki tildes elder jastarynyń basyn qosatyn jobaǵa ainaldy. Elordada «Nur-Sultan qalasynyń qoǵamdyq damý isteri basqarmasy» men «Qazaqstan KVN Odaǵy» respýblikalyq jastar qoǵamdyq birlestiginiń uiymdastyrýymen jaidarman festivali ótti.
Úsh kúnge sozylǵan halyqaralyq jaidarman festivali arnaiy baǵdarlamalyq jospar negizinde júzege asty. Festivaldiń alǵashqy kúni sheteldik jastar men qazaqstandyq toptardy tabystyrý maqsatynda ashylý saltanaty ótti. Jastar saraiynyń tórinde belgili jaidarmanshylardyń júrgizýimen kontserttik baǵdarlama qoiyldy. Sondai-aq, festivaldiń ekinshi kúni sheteldik qatysýshylar úshin Nur-Sultan qalasyna arnaiy uiymdastyryldy. Qala ishinde ornalasqan záýlim ǵimarattar men murajailardy, «Báiterek» pen «EKSPO» keshenderin jáne teatrlardy aralady. Ekskýrsiia barysynda qonaqtarǵa qazaq eliniń tarihy men salt-dástúri, búingi jetistikteri jaily keńinen aqparat berildi.
Festivaldiń úshinshi kúni túrki tildes memleketterden kelgen qatysýshy komandalar men qazaqstandyq toptar arasynda jaidarman saiysy uiymdastyryldy. Beibitshilik jáne kelisim saraiynda ótken dodaǵa barlyǵy 10 komanda qatysty. Onyń altaýy sheteldik, terteýi qazaqstandyq top boldy. Olardyń qatarynda elordanyń namysyn qorǵap, Nur-Sultan qalasynyń atynan «Qazaqstan halyqtary assambleiasynyń quramasy», Ekibastuz qalasynan «Biz qazaqpyz» komandasy, Shymkent qalasynan «Million» - «Nur-Úmit» óner ortalyǵy jáne akademik Ábdimusa Qýatbekov atyndaǵy halyqtar dostyǵy ýniversiteti «Búgin.kz» komandalary qatysty.
Kórshiles qyrǵyz elinen «Pozitiff», Ózbekstan elinen «Qaraqalpaqstan quramasy», Mońǵoliia elinen «Baian ólke quramasy» komandalary qyzyqty oiyn úlgisin kórsetti. Sondai-aq, kórshiles Resei eliniń úsh qalasynan «Bashqurtstan quramasy», «Noǵai quramasy - Altyn orda», «Tatarstan quramasy» komandalary kelip qatysty.
Qazylar alqasy komandalardyń oiyn órnegin baǵalap, jeńimpazdardy anyqtady. Saiys nátijesi boiynsha, III orynǵa (150 myń teńge) Mońǵoliia eliniń «Baian ólke quramasy», Ózbekstan Respýblikasynyń «Qaraqalpaqstan quramasy» men Reseidiń «Bashqurtstan quramasy» komandalaryie boldy. Al, II orynǵa Qyrǵyzstan Respýblikasynyń «Pozitiff» komandasy men Shymkent qalasynyń «Búgin.kz» komandalary laiyq dep tanylyp, 300 myń teńge kóleminde qarjylai syiaqyǵa ie boldy. Bul oiynnyń bas júldesin «Noǵai quramasy - Altyn orda» komandasy jeńip aldy. Jeńimpazdar 1 million teńge kólemindegi qarjylai syilyqty qanjyǵaǵa bailady.
Sondai-aq, top ishinde daralanyp, úzdik oiynymen kózge túsken «Tatarstan quramasynyń» oiynshysy Nail Salahov «Úzdik oiynshy» atalymyna ie boldy.
