Qazaqstannyń bastamasymen ótken Túrki keńesiniń kezekten tys beiresmi sammiti tarihi jiyn boldy. Bul týraly Halyqaralyq Túrki akademiiasynyń prezidenti Darhan Qydyráli jelidegi paraqshasynda jazdy, dep habarlaidy "Ult aqparat".
«Sammitke Eýropadan Majarstannyń jáne irgedegi jabyq el Túrkimenstannyń qatysýy bas qosýdyń salmaǵyn arttyra tústi. Bul rette jiyn taqyrybynyń Túrkistanǵa arnalýy jáne Qarabaq jeńisinen keiingi alǵashqy keleli keńes bolýy da mańyzdy.
Sammitte aitylǵan oilar men memleket basshylarynyń usynystaryn 4 taqyrypqa bólýge bolady:
1. Ekonomikalyq yntymaqtastyqty arttyrý, sonyń ishinde kólik-komýnikatsiia salasy men týrizmge mán berý, Aziia men Eýropany jalǵaityn «Turan dálizin» tiimdi paidalaný, Investittsiialvq Qor qurý, trans-shegaralyq sýlar máselesin sheshý;
2. Saiasi yntymaqtastyqty arttyrý, Túrki keńesiniń atyn ózgertip, halyqaralyq uiym retinde ataý, strategiialyq seriktestikke mán berip, bolashaq bailanystarǵa baǵdar bolatyn qujat qabyldaý, yntymaqtastyq uiymdarynyń qurylymdyq qujattaryn aiaqtaý;
3. Gýmanitarlyq-mádeni bailanystardy arttyrý, túrki áleminiń tuǵyrly tulǵalary Nizamidiń 880, Iýnýs Ámireniń 700, Naýaidiń 580 jyldyǵy syndy mereitoilardy birge atap ótý, Túrkistan men Q.A.Iasaýi murasyn dáripteý, mádeniet salasynda Naýai atyndaǵy halyqaralyq syilyq bekitý;
4. Ǵylym-bilim salasynyń pandemiia kezinde mańyzy artqandyǵyn eskere otyryp, ǵylymi integratsiiaǵa mán berý, uly tulǵalar men qasterli mekenderdi zerttep, zerdeleý, Túrkistanda arheologiialyq qazba jumystaryn júrgizý, baýyrlas elderdiń joǵary oqý oryndaryn úilestiretin «Uly túrkiler» jobasyn bastaý, Q.A. Iasaýi atyndaǵy ýniversitetti túrki áleminiń ortaq oqý ornyna ainaldyryp tamyrlas jurttar ókilderine arnap 50 «Iasaýi shákirtaqysyn» belgileý», - dedi Darhan Qydyráli.
Sonymen qatar ol ǵylym men bilim salasyndaǵy usynystardyń barlyǵyn Qazaqstan Prezidenti Qasym-Jomart Toqaev aitqanyn jetkizdi.
«Bul usynystar, ásirese «Iasaýi shákirtaqasy» bolashaq integratsiianyń bekem irgetasy bolatyn bastamalar. Sondyqtan túrki álemindegi ǵylymi integratsiiany úilestirýge jaýapty uiym retinde akademiia atynan bul usynystarǵa qýanyp qaldyq.
Taǵy bir atap aitarlyq jait, Memleket basshysy Q.Toqaev Túrki keńesine alǵash ret qatysyp otyrǵanymen, alqaly jiyndy óte jaqsy júrgizdi. Buǵan deiin Elbasy 1992 jyldan bastap barlyq Sammitterge qatysqany belgili. Demek Qazaqstannyń túrki álemindegi qarashańyraq retindegi qyzmeti sabaqtastyq arqyly jalǵasyn taba beredi», - dep tolyqtyrdy Túrki akademiiasynyń prezidenti.
