Túrkistanda ótip jatqan Túrki álemi ádebi jýrnaldary redaktorlarynyń VIII kongresinde jyldyń úzdik ádebietshisi anyqtaldy. Biylǵy jyly bul syilyq 90 jastan asqan ózbekstandyq jazýshy Shúkirolla Iýsýpovqa berildi, dep habarlaidy QazAqparat agenttigi.
Túrki elderiniń 19 memleketinen redaktorlar men jazýshylary, kórnekti mádeniet qairatkerleri qatysyp otyrǵan kongress biyl segizinshi ret uiymdastyrylyp otyr. Qalamgerlerdiń basyn qosqan jiynda Eýraziia jazýshylar odaǵynyń tóraǵasy Iakýb Omerogly sóz sóilep, túrki elderi ádebietiniń búgingi jaǵdaiyna toqtaldy.
«Basqosýda ádebiet jýrnaldaryndaǵy oi-pikir, halyqtyń sana seziminde jańalyqtar ortaǵa salynady. Ádebiettegi jańalyqtar aitylady. Jýrnaldardyń redaktorlary osynda bas qosyp, ádebietterimizdegi jańa úrdisterdi bólisip, bolashaqqa birge baraiyq degen másele kóterdi», - deidi Iakýb Omerogly.
Sondai-aq, Kongrestete Túrkiianyń tanymal tarihshysy, halyqaralyq Osmanly Etiýdteri komitetiniń basqarma múshesi, professor Ilber Ortaily «Túrki áleminiń mádenietindegi Túrkistannyń tarihi orny» atty baiandama jasady.
Al Ońtústik Qazaqstan oblysy ákiminiń orynbasary Ulasbek Sádibekov túrki álemi aqyn-jazýshylary basqosýynyń mańyzdylyǵyna toqtaldy.
«Búgin ashylyp otyrǵan Túrki elderi ádebi jýrnaldary redaktorlarynyń VIII kongresi mán mańyzy tereń, aitýly sharalarynyń birine ainalary sózsiz. Bul kongrestiń maqsaty - túrki halyqtarynyń ádebi bailanystaryn damytý arqyly túrki tilderindegi qazirgi zamanǵy aqparat almasýlardy jetildirý, ádebiet salasyndaǵy úzdik týyndylardy, ozyq qalamgerlerdi anyqtaý bolyp otyr. Adamzat órkenietiniń óristenýine, mádeniettiń mándi bolýyna, aqyl oiynyń kemeldenýine túrik halyqtarynyń qosqan úlesi zor. Jańa dáýirde de túrki halyqtarynan shyqqan kórnekti aqyndar men jazýshylar álem ádebietinde ózindik únimen kelip, qoltańbasyn qaldyra bildi. Qasietti Túrkistan shaharynda ótkizilip otyrǵan basqosý baýyrlas halyqtardyń mádenietterin nyǵaita túsýge, ulttyq ádebietterdiń kókjiegin keńeitýge septigin tigizedi dep úmittemin», - dedi oblys ákiminiń orynbasary Ulasbek Sádibekov.
Al, kongrestiń ekinshi bóliginde sektsiialyq májilistermen jalǵasyp, onda Túrkiia, Iran, Irak, Ázerbaijan, Ózbekstan, Qyrǵyzstan, Altai (RF), Daǵystan (RF), Tatarstan (RF), Bashqurtstan (RF), Kabardin-Balqar (RF), Saha-Iakýtiia (RF), Kosovo, Makedoniia, Soltústik Kiprdan jáne Qazaqstannyń birneshe qalasynan kelgen belgili ádebietshiler óz oilaryn ortaǵa saldy. Qalamgerler Túrkistan qalasynyń týristik aimaqtaryna ekskýrsiia jasady.
Aita keteiik, TÚRKSOI halyqaralyq uiymynyń qoldaýymen sońǵy on jylda dástúrli sharaǵa ainalǵan Túrki álemi ádebi jýrnaldary redaktorlarynyń kongresi buǵan deiin Túrkiia, Tatarstan, Soltústik Kipr jáne Ázerbaijanda ótkizilgen bolatyn.
