Qazaqstan Respýblikasynyń Prezidenti Qasym-Jomart Toqaev Túrkitildes elder Parlamenttik Assambleiasynyń H plenarlyq otyrysynyń qatysýshylaryna quttyqtaý hat joldady, dep habarlaidy QazAqparat.
Quttyqtaý hatty jinalǵandar aldynda Májilis Tóraǵasy Nurlan Nyǵmatýlin oqyp berdi.
- Qazaqstannyń Tuńǵysh Prezidenti, Elbasy Nursultan Nazarbaevtyń bastamasymen qurylǵan TúrkPA baýyrlas elderdiń birligin bekemdeitin bedeldi uiym. Mereitoilyq basqosýdyń qasietti Túrkistan qalasynda ótýiniń zor simvoldyq máni bar. Túrki dúniesiniń rýhani astanasynda ótip jatqan alqaly jiyn tamyrlas halyqtardy ortaq múddege jumyldyrady. Bizdiń elderimiz aldyna zor maqsattar qoiyp otyr. Jańa syn-qaterlerge tótep beremiz desek, ózara yntymaqtastyqty barynsha nyǵaita túsýimiz qajet. Áriptesterimizdiń áleýetin arttyryp, túrki áleminiń halyqaralyq arenadaǵy rólin kúsheitýge tiispiz, - dep jazylǵan Memleket basshysynyń quttyqtaý hatynda.
Qasym-Jomart Toqaev osy rette jahandyq jáne óńirlik túitkilderge bailanysty ustanymymyz bir bolýy airyqsha mańyzdy ekenin atap ótti.
- Bul jumysta TúrkPA-nyń alatyn orny erekshe. Bizdiń parlamentterimiz árbir máselege túrki jurtynyń tutastyǵy turǵysynan qaraýy kerek. Búgingi basqosýda osy baǵytta saliqaly oilar aitylyp, tyń bastamalar kóteriledi dep senemin! – dedi Memleket basshysy.
Osy oraida, Toqaev plenarlyq otyrysqa qatysýshylarǵa sáttilik tilep, Túrki halyqtary birliginiń arta berýine niettestik bildirdi.
