Almatynyń týristik áleýetin jarnamalaýǵa qarjy bólinedi. Bul týraly brifing barysynda qala ákiminiń orynbasary Iliias Óserov málim etti, dep habarlaidy QazAqparat.
Spikerdiń sózinshe, Almaty qalasy týristerdi tartatyn ortalyq bolǵandyqtan, biýdjet qarajatyn osy salaǵa, onyń ishinde shetelde ilgeriletýge jumsaidy.
Bul - tek shyǵyn ǵana emes, eń aldymen týristik aǵyndy ulǵaitýǵa investitsiia tartýǵa yqpal etedi.
Onyń aitýynsha, álemniń eń iri qalalarynda – Doha, Inchhon, Máskeý, Abý-Dabi, Dýbai jáne Gonkong áýejaiynda imidjdik beinerolikterdi kórsetý úshin 143 mln teńge bólindi.
Sondai-aq, Máskeý, Tashkent jáne Baký metropolitenderinde 114 mln teńgege taqyryptyq jarnama ornalastyryldy.
«Jarnama jariialanǵan elderde qyzyǵýshylyq aitarlyqtai ósti. Ol 8 millionǵa jýyq adamdy qamtydy. KRMG1 zertteý nátijeleri boiynsha Almatydaǵy árbir týrist kem degende 100 dollar jumsaidy, qysta bul soma qysqy taý sportynyń tanymal bolýyna bailanysty áli de ulǵaiýy múmkin. Tiisinshe, bul - qalaǵa jáne onyń ekonomikasyna investitsiia», - deidi ol.
Sonymen qatar, ol osy jyly Almaty týraly imidjdik beinerolikterdi jasaýǵa jáne ilgeriletýge 150 mln teńgeden astam qarajat bólingenin rastady.
«Olardy Eurosport 1/2, Discovery, Animal Planet Travel Channel, EMEA, Russia, Asia siiaqty halyqaralyq telearnalarda kórsetý josparlanǵan bolatyn. Biraq karantinge jáne Eýropa elderimen reisterdiń jabylýyna bailanysty beinerolikterdiń jarnamasy toqtatyldy. Bul qarjy biýdjetke qaitaryldy», - deidi Almaty ákiminiń orynbasary.
Biyl Almaty men oblystyń týristik áleýetin kórsetý úshin shetelden 33 bloger shaqyryldy, óitkeni áleýmettik jeliler - búginde eń tiimdi jarnama alańdarynyń biri.
Sondai-aq, Iliias Óserov 2021 jylǵa memlekettik aqparattyq tapsyrysqa biýdjetten 3,7 mlrd teńge bólingenin tilge tiek etti.
