Bailanys sapasyn jaqsartý maqsatynda biyl Nur-Sultan qalasynda 37 bazalyq stansa ornatylyp, 35 stansa jóndeýden ótti. Bul týraly QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin málim etti, dep habarlaidy QazAqparat.
Onyń aitýynsha, bir-eki turǵynnyń shaǵymyna bailanysty mamandar úidiń shatyryndaǵy bazalyq stansalardy alyp tastaýǵa májbúr.
«Biz úidegi 99 turǵyndy tyńdap, bailanys sapasyn qamtamasyz etýimiz kerek pe, álde radiofobiiasy bar bir turǵyndy tyńdaýymyz kerek pe? Bazalyq stansa onyń densaýlyǵyna ziian keltiredi dep oilaidy. Onyń otbasynda bireý qaterli isikke shaldyqqan, sebebin sodan kóredi. Sondyqtan bazalyq stansany bir jerden alyp tastap, ekinshi jerge ornalastyryp otyrýǵa májbúrmiz. Árine, bul nátijesiz jumys», - dedi Baǵdat Mýsin elordada ótken «Ashyq esik kúni» sharasy barysynda.
Osy oraida ministr bazalyq stansalarǵa qatysty máseleni zań aiasynda sheshýdi usynyp otyr.
«Bir turǵynnyń shaǵymyna qulaq asyp, bazalyq stansany alyp tastaý tiimsiz. Menińshe stansalardy alyp tastaý máselesin ujymdyq talqyǵa salý kerek. Biyl birinshi toqsanda Nur-Sultan qalasynda 37 bazalyq stansa ornatylyp, 35 stansa jóndeýden ótti», - deidi ol.
Sondai-aq atalǵan jaitqa qatysty sala mamany da pikir bildirdi.
«Bazalyq stansany ornatpas buryn bailanys operatorlary sanepidemiologiialyq mekemeniń ruqsatyn suraidy. Iaǵni stansanyń adam densaýlyǵyna ziiandy emes ekendigi týraly sanitarlyq norma men ereje bar. Bazalyq stansa sanepidemiologiialyq qyzmettiń ruqsatynan keiin ǵana ornatylady», - deidi QR Tsifrlyq damý, innovatsiialar jáne aeroǵarysh ónerkásibi ministrligi telekommýnikatsiia komiteti tóraǵasynyń orynbasary Zúlfiia Qudaibergenova.
Onyń aitýynsha, Qazaqstanda bailanys jelisi álemdik tendentsiiaǵa sáikes damyp jatyr.
