Qazirgi kezde kásipkerlerdiń jinaǵan qorlary taýsylýda. Bul týraly Parlament Májilisiniń jalpy otyrysynda depýtat Berik Dúisenbinov aitty, dep habarlaidy QazAqparat.
«Aq jol» fraktsiiasynyń depýtattary óńirlerde kásipkerlermen kezdesý barysynda birqatar máselelerdi talqylaǵan bolatyn. Solardyń ishinde restoratorlarmen karantin shekteýlerine qatysty másele qyzý pikirtalas týǵyzdy. Osy biznestiń ókilderi otbasylyq is-sharalardy ótkizýge tyiym salýdy alyp tastaýdy talap ete otyryp, óz tarapynan usynystar paketin de daiyndap qoiǵan. Mysaly, qyzmetkerlerdi 100 paiyz vaktsinatsiialaý, «Ashyq» júiesin qoldaný, úi-jailardy dezinfektsiialaý, kelýshiler tolymdylyǵyn 30-50 paiyzdan asyrmaý, bir kelýshige 4 sharshy metr jerden kem bolmaýy jáne taǵy basqalary.
Olardyń aitýynsha, pandemiianyń alǵashqy kúnderinen bastap, ózderi karantin sharalaryna belsendi túrde yqpal etken, jumystaryn toqtatyp, jumyssyz qalǵan qyzmetkerlerge jinaqtarynan jalaqy tólep, aýrýhanalarǵa qajetti jabdyqtar men jeke qorǵaný quraldaryn satyp alýǵa kómektesip, búginde muqtaj adamdarǵa dári-dármekpen, azyq-túlikpen kómektesýdi jalǵastyrýda», - dedi B. Dúisenbinov Premer-Ministrdiń orynbasary Eraly Toǵjanovqa joldaǵan saýalynda.
Depýtattyń sózine qaraǵanda, qazirgi kezde kásipkerlerdiń jinaǵan qorlary da, shydamdary da taýsyldy. Kúndelikti turmys-tirshilik shyǵyndaryna qosa, shekteýlerge bailanysty jumyssyz bos turǵan ǵimarattardyń kommýnaldyq tólemderi, ony qarap, kúzetýge ketetin tólemder kásipkerlerge jyǵylǵannyń ústine judyryq bolyp otyr.
«Ókinishke qarai, virýs ómirimizdiń turaqty faktoryna ainalýda. Al ómir jalǵasýda: jastar otbasyn qurady, adamdar ómirge keledi jáne dúnieden ótedi. Bizdiń halqymyz qyzyǵyn da, qaiǵysyn da jaqynymen birge bólisken edi. Al búginde azamattarymyz keń ǵimarattarda saqtyq sharalaryn saqtai otyryp ótkizetin otbasylyq sharalardy antisanitarlyq tar jerlerde tyǵylyp ótkizýge májbúr. Otbasylyq sharalardy ótkizýge ruqsat bermeý, shyn máninde, indettiń taralýyn toqtatýǵa esh áser etip otyrǵan joq. Shekteý sharalary kózboiaýshylyqqa, indetpen kúrestiń beishara kórinisine, korrýptsiiaǵa ainaldy. Resmi túrde shekteý bolǵanymen, is júzinde januialyq sharalar men toi jiyndar páterlerde, jeke úiler men kózden tasa kafelerde ótip jatyr. Onyń ústine, óńirlerde sheneýnikterge jaqyndyǵy bar nemese «qajet jerde» qunyn tólegen meiramhanalar táýlik boiy eshqandai shekteýsiz, qonaqtar sanyna qaramai jumys isteitindigi de eshqandai da qupiia emes», - dedi depýtat.
«Sondai-aq, qoǵamdyq kólikterdegi iin tiresken adamdar men Halyqqa qyzmet kórsetý ortalyqtaryndaǵy uzyn-sonar kezekterdi kórgende qandai sanitarlyq normalar týraly aitýǵa bolady?!», - dep toqtaldy Berik Dúisenbinov.
Joǵaryda aitylǵandardy eskere otyryp, «Aq jol» fraktsiiasynyń depýtattary Úkimetke osy máseleni jedel qarastyryp, shuǵyl sheshim qabyldaý maqsatynda birneshe balamaly jobalar:
1) otbasylyq sharalardy ótkizýge tyiym salynatyn bolsa, onda búginde shekteýdiń nátijesinde qańyrap bos turǵan ǵimarattardy odan ári paidalaný, olardy jańa maqsatqa beiimdeýge, iaǵni mektepter, aýrýhanalar, sport mekemelerine ainaldyryp, qaita jabdyqtaýǵa kómektesýdi;
2) eger otbasylyq sharalar ótkizýge ruqsat etilgen jaǵdaida, daǵdarystan shyǵarýǵa qaýqarly, qajetti, ári kásipkerlerge túsinikti, ádil sharalardy qarastyra otyryp, shekteýden retteýge kóship, biznes obektilerin qaita jandandyrýdy jáne restoratorlardyń karantin talaptaryn oryndaý maqsatynda ázirlegen usynystar paketin qarastyrýdy;
3) indetti fors-major retinde resmi túrde moiyndap, toqtap turǵan shaǵyn jáne orta biznes obektileri boiynsha kommýnaldyq tólemderge, múlik salyǵyna jumsalatyn basqa da shyǵyndardy óteýdi usynady.
