QR Ishki ister ministriniń orynbasary Sáken Sársenov «102» mobildi qosymshasynyń qalai jumys isteitinin túsindirdi, dep habarlaidy QazAqparat.
1 aqpanda QR IIM búgin jańa servis – «102» mobildi qosymshasyn iske qosqan edi. Qosymshany Android júiesindegi smartfondarǵa arnalǵan Play Market-ten jáne IOS júiesindegi smartfondarǵa arnalǵan App Store-dan júkteýge bolady.
«Bul qosymsha – «Halyq únine qulaq asatyn memleket» tujyrymdamasy aiasynda Ishki ister ministri Erlan Turǵymbaevtyń tapsyrmasymen jasalǵan úlken joba. Buǵan deiin azamattar tek qana 102 nómirine qońyraý shalatyn, al qazir kópkanaldy júie arqyly, iaǵni áleýmettik jeliler, ministrlik saity, Telegram-bot jáne «102» mobildi qosymshasy arqyly habarlasatyn múmkindik bar», - dedi Sáken Sársenov Nur-Sultan qalasynyń jedel basqarý ortalyǵynda ótken tanystyrylymda.
Mobildi qosymshanyń taǵy bir ereksheligi – shaǵymdanýshynyń aty-jóni, meken-jaiy, ornalasqan jeri avtomatty túrde qoljetimdi bolady.
«Buryn 102-ge qońyraý shalǵanda politseiler shaǵymdanýshynyń aty-jónin, mekenjaiyn suraityn, oǵan ýaqyt ketetin. Al qazir mobildi qosymshada aýdio-videoqońyraý jasaǵanda qai jerden habarlasqanyńyzdy avtomatty túrde kóredi jáne oqiǵa ornyna jedel túrde jaqyn mańdaǵy politsiia jasaǵyn jiberedi. Mundaǵy qońyraýlar sol óńirdegi operativti ortalyqqa birden túsip otyrady», - dep túsindirdi ministrlik ókili.
1 aqpannan beri mobildi qosymshany 5 myń azamat ornatqan, 2283 qońyraý shalynǵan, onyń ishinde 1200-i testik túrde, qalǵandary – politsiiaǵa kómek surap júgingender.
«123 habaralma kelip tústi, sonyń ishinde balalar men áielderge qatysty zorlyq-zombylyq jáne kólik apattary týraly habarlamalar jii kezdesti. Eń belsendi óńirler – Nur-Sultan men Almaty qalalary jáne Pavlodar oblysy. Qosymshany qazaqstandyq mamandar ázirlegen, aqparattyq qaýipsizdik jáne derbes derekterdiń saqtalýy máselelerin Tsifrlyq damý, innovatsiialar jáne aeroǵarysh ónerkásibi ministrligimen birlesip sheshtik», - deidi Sáken Sársenov.
