«Báiterek» ulttyq basqarýshy holdinginiń enshiles uiymy «Qazaqstan ipotekalyq kompaniiasy» ipotekalyq uiymynyń ataýy «Qazaqstan turǵyn úi kompaniiasy» AQ bolyp ózgertildi, dep habarlaidy "Ult aqparat".
Resmi qaita tirkeý 2021 jylǵy 26 qańtarda tirkeýshi organda júzege asyryldy.
Esterińizge sala keteiik, Memleket basshysy Qasym-Jomart Toqaevtyń tapsyrmasy boiynsha «Báiterek» ulttyq basqarýshy holdinginiń turǵyn úi blogy úsh enshiles kompaniiany – «Báiterek development» AQ, «Turǵyn úi qurylysyna kepildik berý qory» AQ jáne «Qazaqstan ipotekalyq kompaniiasy» IU» AQ Qazaqstannyń turǵyn úi qurylysynyń biryńǵai operatoryna biriktirý arqyly ózgertildi.
2020 jylǵy 8 shildede Qazaqstan Prezidenti «Qazaqstan Respýblikasynyń keibir zańnamalyq aktilerine turǵyn úi baǵdarlamalary operatorlarynyń sanyn qysqartý máseleleri boiynsha ózgerister men tolyqtyrýlar engizý týraly» tiisti Zańǵa qol qoidy.
«Qazaqstan turǵyn úi kompaniiasy» AQ-nyń jalǵyz aktsioneri 100% memlekettik aktsiialar paketine ielik etetin «Báiterek» holdingi bolyp qala beredi. Birikken kompaniia Turǵyn úi qurylysynyń biryńǵai operatory retinde mynadai negizgi baǵyttar boiynsha jumysyn jalǵastyrady:
- ipotekalyq qaryzdar berý;
- keiinnen satyp alý quqyǵymen jalǵa beriletin turǵyn úi berý;
- memlekettik baǵdarlamalar sheńberinde qurylys salýshylarǵa kredit berý;
- jeke qurylys salýshylardyń kreditterin jáne ipotekalyq qaryzdardy sýbsidiialaý;
- turǵyn úi qurylysyn qarjylandyrý jáne investitsiialyq jobalardy iske asyrý;
- turǵyn úi qurylysynyń aiaqtalýyna kepildik berý.
Osylaisha, Qazaqstan turǵyn úi kompaniiasy el halqyn sapaly jáne jaily turǵyn úimen qamtamasyz etýdi arttyrýǵa baǵyttalǵan memlekettik sharalardy odan ári iske asyrýdy, onyń ishinde qurylys salasyn qoldaý, turǵyn úi naryǵyndaǵy suranys pen usynystardyń teńgerimdi ósýi úshin jaǵdai jasaý jáne ipotekalyq kredit berý jolymen qamtamasyz etedi.
Qazaqstan Úkimetiniń 2020 jylǵy 8 qyrkúiektegi № 557 qaýlysyna sáikes «Qazaqstan ipotekalyq kompaniiasy» IU» AQ-na Turǵyn úi qurylysynyń biryńǵai operatory mártebesi berilgenin atap ótý kerek.
