Memleket basshysy Qasym-Jomart Toqaev Ishki ister ministri Erlan Turǵymbaevty qabyldady, dep habarlaidy Aqorda.
Memleket basshysyna elimizdegi kriminogendik jaǵdai, ishki ister organdarynyń biylǵy jyldyń birinshi toqsanynda atqarǵan jumysynyń qorytyndylary týraly málimet berildi.
Ministr Prezidentke vedomstvo jumysyndaǵy birqatar oń úrdister jaiynda aitty. Erlan Turǵymbaevtyń aitýynsha, biyl qylmys deńgeii 13 paiyzǵa qysqarǵan, tonaý, urlyq jáne buzaqylyq 37 paiyzǵa az tirkelgen. Qoǵamdyq oryndar men kóshelerdegi qaýipsizdik deńgeii artqan.
Qasym-Jomart Toqaevqa esirtki qylmysyna qarsy kúres týraly baiandaldy. Ishki ister ministriniń málimetterine sáikes, birinshi toqsanda politseiler 860 esirtki qylmysyn anyqtap, sintetikalyq zattar jasaityn 8 zerthanany joiǵan, 1 tonnadan astam esirtki tárkilegen.
Ministr Prezident tapsyrmalarynyń oryndalý barysy týraly, onyń ishinde, «qol jetimdi politsiia» qaǵidatyn qamtamasyz etý jáne ýchaskelik inspektorlar qyzmetin reformalaý jaiynda aqparat berdi.
Erlan Turǵymbaev áielder men balalardy zorlyq-zombylyqtan qorǵaý jónindegi bólimshelerdiń shtat sanynyń tiisti normalarǵa jetkizilgeni, áielder men balalarǵa qatysty qylmystyq isterdi júrgizý boiynsha tergeýshi áielderdiń mamandanýyn kezeń-kezeńimen engizý týraly baiandady.
Kezdesý qorytyndysy boiynsha Memleket basshysy ishki ister organdaryn tsifrlandyrý, jol apattarynyń aldyn alý jumystaryn jandandyrýdy tapsyrdy. Prezident jeke quram men vedomstvonyń aqparattyq saiasatynyń jumysyn jetildirý qajet ekenine nazar aýdardy.
